Serxhio Porrini, ish-futbollist i Juventusit dhe ndihmës trajneri aktual i Edi Rejës te Shqipëria foli në “1 Football Club”, një program radiofonik në Itali. Numri dy i stolit të Kombëtares foli fillimisht për Armando Brojën. Sulmuesi i është bashkuar Çelsit ditët e fundit, por e ardhmja e tij është në pikëpyetje pasi për të ofertat nuk mungojnë, madje edhe nga Napoli.
“Armando Broja zëvendësuesi i Osimhen te Napoli? Ai është një futbollist me një perspektivë të madhe, edhe nëse nuk ka të njëjtat karakteristika si Osimhen. Broja ndoshta nuk do të ishte zëvendësuesi ideal për cilësitë që zotëron, ndryshe nga nigeriani. Ai nuk është një sulmues statik, por i lëvizshëm, ai posedon cilësi vërtetë të çmendura. Do ta shihja mirë te Napoli, ndoshta edhe një dyshe me Osimhen”.
Më pas Porrini foli edhe sa i përket eksperiencës si ndihmës-trajner me Rejën. Italiani është prej 3-vitesh pjesë e Kombëtares shqiptare dhe thekson se dëshira më e madhe dhe objektivi mbetet kualifikimi i Shqipërisë në Europian.
“Kemi tre vite që punojmë së bashku, pasuar nga eksperienca tek Atalanta. Ndihem sikur kam kohë që jam me Rejën, ndihem rehat me të. Është një eksperiencë e mrekullueshme dhe e rëndësishme, edhe për ambiciet e kombëtares. Prioriteti është arritja në Europianin e ardhshëm. E konsideroj veten me fat që punoj me një teknik me përvojë.”
Nga Armando Broja te Xhakomo Vrioni, një tjetër sulmues që konsiderohet si e ardhmja e Kombëtares shqiptare. Në sezonin e fundit, 23-vjecari ishte pjesë e Tirolit në Austri. Futbollisti shqiptar shënoi 19 gola në bundesligën austriake duke fituar edhe këpucën e artë.
“Procesi i tij ka kaluar edhe në kampionatin tonë, por ai nuk ka mundur të shprehë maksimalisht potencialin e tij, sidomos për shkak të problemeve të shumta fizike. Ky është viti i tij i parë në Austri dhe ka jetuar një sezon si protagonist me Tirolin, Fatkeqësisht nuk mundi të lërë gjurmë në futbollin italian, sidomos për metodën e gjykimit të përdorur për ta vlerësuar. Do të isha i lumtur ta shihja në Itali, edhe sepse është më i fortë se disa nga kolegët e tij në Serinë A”.
