Pas vetëm një dite, Bordi i Transparencës vendosi këtë të enjte të ndryshojë sërish çmimet e karburanteve në vend.
Bordi ka vënë sërish sot “dorën në zemër” duke i hequr edhe një 6 lekësh çmimit të një litri naftë. Kështu, duke nisur nga sot, një litër naftë do të shitet me 249 lekë, kurse një litër benzinë me 242 lekë.
Ashtu si dje, Bordi ka vendosur që 6 lekëshin e zbritur nga nafta, t’ia ngarkojë benzinës. Kjo e fundit do të shitet nga sot 6 lekë më shtrenjtë se dje kur ishte 236 lekë/ litri.
Ndërkohë, çmimi i gazit mbetet i njëjtë.
Gjithçka ndodh në një kohë kur çmimi i karburanteve në tregjet ndërkombëtare ka pësuar ulje të forta gjatë ditëve të fundit, megjithatë në Shqipëri reflektohet pak ose aspak.
Njoftimi i Bordit:
Çmimi i shitjes me pakicë i naftës të jetë jo më shumë se 249 lekë/litri, ndërsa i shitjes me shumicë jo më shumë se 237 lekë/litër.
Çmimi i shitjes me pakicë i benzinës të jetë jo më shumë se 242 lekë/litri, ndërsa i shitjes me shumicë jo më shumë se 230 lekë/litër.
Çmimi i shitjes me pakicë i gazit të jetë 83 lekë/litri me pakicë dhe i shitjes me shumicë 71 lekë/litër për automjetet.
Çmimet e caktuara nga Bordi do të hynë në fuqi sot datë 29 qershor ora 18:00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes. Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi. Në rast të shkeljeve të konstatuara nga operatorë të ndryshëm do të vendoset pezullimi i aktivitetit. Jemi në monitorim të vazhdueshëm të ecurisë së bursave, me qëllim reagimin sa më të shpejtë.
