Më 21 dhjetor, Bashkia e Himarës i dha 1.6 milion Euro për ujësjellësin e 4 resorteve/ Pasi u dhuroi tokat në Palasë-Drimadhë, me marifetin e gjoja biznesit për gurore por ata ndërtuan qyteza rezidenciale me vila e pallate; dhe pasi u dha plazhet me qira 3 lekë/m2 në ditë për 20 vite, Babloku po u investon klientëve oligarkë edhe infrastruktrën e bizneseve me taksat e shqiptarëve, kur me vendim qeverie e kanë detyrim ta financojnë e ndërtojnë vetë
Kryeministri Edi Rama, ka vendosur të financojë nëpërmjet firmës klienteliste “Gjikuria shpk”, miliarda lekë nga taksat e shqiptarëve, për të ndërtuar infrastrukturën e resorteve private të Milo Gjikurisë dhe 3 oligarkëve të tjerë në zonën Palasë-Drimadhë.
Kujtojmë, se në vendimet e qeverisë, Babloku u ka dhuruar tokat e u ka dhënë nga 10-15 ha plazhe publike, me qira 3 lekë/m2 në ditë për 20 vjet, me kushtin kontaktor, që infrastruktura ujë, rrugë, ndriçim e parqe, të investohet dhe ndërtohet prej vetë oligarkëve.
Mirëpo, fakti që publikuam më 30 dhjetor 2020, tregon se Bashkia Himarë, i ka dhënë firmës ‘Gjikura shpk’, tenderin me vlerë 1.6 milionë Euro fond buxhet shteti, për të ndërtuar rrjetin e ujësjellësit, vetëm për resotrin e tij dhe të 3 oligarkëve të tjerë në Dhërmi-Palasë.
Pas ujësjellësit, më datë 6 janar 2021, Babloku i ka dhënë firmës ‘Gjikuria shpk’; edhe dy tendera të tjerë me vlerë totale 20 milionë Euro nga taksat e shqiptarëve, si financim për infrastrukturën deri tek resortet e plazhit.
Tenderi i parë ka datën 6 janar 2021, me vlerë kontrate 499 milionë, 736 mijë e 229 lekë të reja pa TVSH, ose afro 5 milionë Euro me TVSH, dhënë nga drejtori Dritan Agolli dhe Erion Braçe, drejtor i Bordit Fondit të Zhvillimit Shqiptar (FSHZH).
Me këto miliarda lekë taksa publike, firma “Gjikuria shpk”, do përmirësojë mjediset parqe, rrugica e ndriçim në resortet dhe plazhet e tij e të 3 oligarkëve të tjerë të Bablokut.
Tenderi i dytë, është dhënë po firmës ‘Gjikuria shpk’, nga drejtori Ergys Verdho i Autoritetit Rrugor Shqiptar (ARRSH), me vlerë kontrate 1 miliardë, 562 milionë, 805 mijë e 164 lekë të reja pa TVSH, me objekt ndërtim rruge në zonën Palasë-Dhërmi.
Në këtë tender, kanë marrë pjesë 6 oligarkët Fusha, Ulaj, Salillari, Buzi etj. të cilët ia kanë lënë këtë “thelë” oligarkut Milo Gjikuria, duke bërë lojëra me gjoja mungesë dokumentesh e kapacitetesh, kur po atë ditë kanë fituar tendera të tjerë rrugësh e rindërtimi nga ARRSH, FSHZH, Bashkia Tiranë, Durrës, Krujë etj.
Sipas informacioneve që disponon “Pamfleti”, thuhet se në zonën plazh “Palasë-Dhërmi-Drimadhë”, është bërë gati edhe investimi nga buxheti i shtetit, me vlerë 6 milionë Euro, për ndërtimin e një stacioni e rrjet energjie elektrike nga OSHEE, vetëm për furnizimin e resortit të Milo Gjikurisë e oligarkëve të tjerë. /Pamfleti
