Ngaqë janë bërë emërime të tilla “ushtarësh”, kemi dhe rekordin botëror të humbjes së 99% të gjyqeve në gjykatat ndërkombëtare, me pasojë 388 milionë Euro të formës së prerë deri tani dhe 450 milionë Euro të tjera në proces me 14 gjyqe; ndërsa në gjyqet brenda Shqipërisë, Avokatura e Shtetit ka humbur 92% të çështjeve, me pasojë 106 milionë Euro dhe pasuri humbje për buxhetin e shtetit deri tani
Avokatura e Shtetit, është një nga institucionet simbol të degradimit e mungesës së integritetit, që kryeministri Rama e ka përdorur personalisht e brutalisht, kundër interesave të shtetit dhe në favor të klientëve biznesmenë vendas e të.
Gjatë 8 viteve në pushtet të PS, në Shqipëri janë ndërruar 5 Avokatë Shteti, duke qenë rekord në krejt vendet e BE, Rajonit e Azisë, për emërim-shkarkimet e tyre të shpeshta, por sidomos për dëmet e mëdha financiare që i kanë shkaktuar shtetit.
Më 26 nëntor 2013, Edi Rama emëroi Avokate Shteti, mikeshën e tij Alma Hicka dhe e shkarkoi më 22 tetor 2018, pas reagimeve nga Strasburgu e 5 gjykatave të arbitrazhit në SHBA-BE, për falsifikime dosjesh bashkë me të shoqin, të cilin e përdorte avokat privat kundër shtetit.
Në 5 vite Avokate Shteti, Alma Hicka i shkaktoi Shtetit Shqiptar 235 milionë Euro humbje me gjyqet brenda e jashtë Shqipërisë; dhe konsumoi 24 milionë Euro hotele, udhëtime, ekspertë, avokatë të huaj etj., pa harruar 105 milionë Euro afera korrupsioni, sipas KLSH.
Jo se nuk e njihte ligjin, por sepse me urdhër të Edi Ramës, bënte pazare me palët kundër shtetit, duke i favorizuar me vonesë dërgimi të dhënash, fshehje dokumentesh e zhdukje provash.
Prandaj pas shkarkimit nga detyra, Edi Rama dhe “ushtarët” e tij shefa në Këshillin e Lartë Gjyqësor e emëruan gjyqtare në Tiranë, por komisioni i “Veting” e përjashtoi nga drejtësia, i detyruar prej 20 provave të zeza, që OMN-SHBA paraqiti për të gjatë detyrës si Avokate Shteti.
Në vend të saj, Avokat Shteti u emërua Artur Metani, ish-drejtor i ligjshmërisë në kryeministri deri në 2013-ën, ndërsa më parë ka qenë këshilltar në presidencë e Konsulent Juridik te “Soros”.
Deri në muajin mars 2020 kur qëndroi në postin Avokat Shteti, Artur Metani nuk mbështeti shtetin në gjyqet ndërkombëtare, por me urdhër të Ramës, krijoi terren të plotë favorizmesh ndaj palëve kundërshtare të shtetit, duke humbur 3 gjyqe e duke lënë gati për humbje 5 gjyqe të tjerë; prandaj Rama e shpërbleu duke e emëruar Kryetar të Inspektoriatit të Lartë të Drejtësisë.
Më 4 mars 2020, Edi Rama emëroi Avokat Shteti, avokaten e tij personale Enkelejda Muçaj, njëherazi avokate e studios ligjore të Ëngjëll Agaçit; e cila po me urdhër të Ramës, firmosi humbjen e 11 gjyqeve ndërkombëtare dhe të 165 gjyqeve brenda vendit.
Kjo u bë e njohur për dy gjëra: Nxorri mashtrimin e Edi Ramës, se gjoja Francesco Becheti nuk e kishte fituar gjyqin 130 milionë Euro; dhe u tha gazetarëve, se Shqipëria ishtë me fat që kishte atë Avokate Shteti, mbasi mund të kishte humbur gjyqe me vlerë 1 miliardë Euro.
Pas kësaj deklarate, me 28 qershor 2021 Edi Rama e shkarkoi nga detyra, ndërsa pas 4 muajsh, me ndërhyrje të Ëngjell Agaçit dhe si shpërblim për shërbimet që kishte kryer në favor të koncesionarëve, Rama e emëroi Zv/ministre të Infrastrukturë-Energjisë.
Në vend të saj, Avokate Shteti u emërua Brunilda Lilo, avokate oligarkësh e trafikantësh biznesmenë në gjyqet kundër shtetit; dhe juriste e firmës koncesionare “NOA CONTROL” të aparateve të karburanteve me vlerë 70 milionë Euro, dhënë nga Rama-Ahmetaj për 20 vite.
Edhe kjo, gjatë 6 muajve qëndrim Avokate Shteti, me urdhër të Ramës hodhi disa firma kundër shtetit në 223 dosje gjyqesh brenda e jashtë Shqipërisë, dhe u shkarkua me 19 janar 2022, duke u zëvendësuar nga Odise Moçka, deri tani me detyrë Inspektor Anti-Korrupsion në kryeministri.
Edhe pse nuk ka mbushur akoma javën në detyrë, ka zëra se dhe Moçka do shkarkohet shumë shpejt, pasi sipas informacioneve, është caktuar përkohësisht, vetëm për të mbaruar punë me disa dosje të tjera gjyqesh në favor të klientelës së Bablokut.
Ngaqë janë bërë emërime të tilla, kemi dhe rekordin botëror të humbjes së 99% të gjyqeve “VIP” në arbitrazhe, me pasojë 388 milionë Euro të formës prerë dhe 450 milionë Euro në proces me 14 gjyqe; ndërsa në gjyqet brenda Shqipërisë, Avokatura e Shtetit ka humbur 92% të çështjeve me pasojë 106 milionë Euro për buxhetin e shtetit deri tani./Pamfleti
