Komisioni i Rithemelimit ka kallëzuar penalisht kreun e Gjykatës së Tiranës, Flamur Kapllanin dhe kancelarin, Donald Xhelili, për shpërdorim detyre.
Kallëzimi është kryer me pretendimin se nuk iu është dhënë vendimi i zbardhur i Blerina Muçës për të bërë palë Alibeajn.
“Në vijim të qëndrimit të bërë publik nëpërmjet deklaratës së ditës së diel dhe në mungesë të reagimit ligjor dhe institucional nga Gjykata e Rrethit Gjyqësor Tiranë, Partia Demokratike e Shqipërisë ka paraqitur sot kallëzim penal ndaj kryetarit dhe kancelarit të Gjykatës së Tiranës, të cilët në mënyrë të qëllimshme ende nuk i komunikojnë zyrtarisht Partisë Demokratike vendimet gjyqësore të cilat cenojnë interesa të ligjshëm të saj.
Partia Demokratike bën thirrje për organet ligjzbatuese që të hetojnë dhe vënë para përgjegjësisë ligjore këdo, i cili me veprime të paligjshme tenton të ndikojë proceset ligjore në shqyrtim nga gjykatat, pavarësisht pozicionit që mban”, thuhet në reagimin e Rithemelimit.
Vlen të theksohet se, Gjykata e Tiranës pranoi dhe regjistroi Statutin e PD-së të dalë nga Kuvendi i 11 dhjetorit të organizuar nga Komisioni i Rithemelimit. Megjithatë, ky vendim u ankimua në Apel nga kreu i Komanduar i Partisë Demokratike, Enkelejd Alibeaj, dhe gjyqtarja Blerina Muça e pranoi ankimin. Gjatë fjalës së mbajtur nga Berati, ditën e djeshme, Sali Berisha i alarmuar se mund të humbas në Apel, ka sulmuar ashpër gjykatën e Tiranës për vonesën e zbardhjes së vendimit, duke theksuar se kjo gjë u ka bllokuar rekursin.
