Presidenti ukrainas Volodymyr Zelensky ka folur në Festivalin e Kanës. Në fjalimin e tij në lidhjen video Zelensky i kërkoi botës së kinemasë të “mos qëndrojë e heshtur” përballë sulmit nga Rusia.
“Jam i bindur se diktatori do të humbasë”, tha Presidenti ukrainas Volodymyr Zelensky, duke krahasuar personazhin e famshëm të Charlie Chaplin me Vladimir Putin gjatë fjalimit të tij në hapjen e Festivalit të Filmit në Kanë.
Zelensky u është drejtuar parlamenteve dhe legjislaturave anembanë botës dhe tani ish-aktori dhe komediani, dhe presidenti aktual ukrainas ka dërguar mesazhin e tij në Festivalin e Filmit në Kanë.
“Në fund, urrejtja do të zhduket dhe diktatorët do të vdesin”, tha ai.
Ai iu referua fuqisë së kinemasë gjatë Luftës së Dytë Botërore, duke përfshirë filmin e Charlie Chaplin “Diktatori i Madh”, i cili tallte Adolf Hitlerin.
“Ne kemi nevojë për një Chaplin të ri për të provuar sot se kinemaja nuk është e heshtur”, tha Zelensky.
