Sport20 Tetor 2022, 15:21

Në Itali flasin për divorc me Interin, Kristjan Asllani kërkon largimin nga zikaltërit

Shkruar nga Pamfleti
Në Itali flasin për divorc me Interin, Kristjan Asllani kërkon

Në Itali flasin për divorc me Interin, Kristjan Asllani kërkon largimin nga zikaltërit

Një lajm “bombë” vjen nga Italia. Kristjan Asllani nuk është i lumtur tek Interi dhe kërkon me ngulm largimin nga zikaltërit në formulën e huazimit.

Sipas asaj që raporton “TuttoMercatoWeb”, minutazhi i paktë dhe pankinat e shumta edhe pse Marselo Brozoviç është ende i dëmtuar, janë arsyet që media e njohur italiane sqaron se fantazisti i Kombëtares shqiptare dëshiron largimin nga Interi që në janar, muajin që përkon me hapjen e dritares së transferimeve.

20-vjeçari nga Elbasani erdhi tek ekipi i Simone Inzagit për të qenë zëvendësuesi i Marselo Brozoviç në rolin e regjisë përpara mbrojtësve, por mesa duket tekniku italian ka preferuar më së shumti Hakan Çalhanollunë dhe Henrik Mikitarianin në rolin e Brozoviçit të dëmtuar.

Nuk dihet ende nëse Interi dëshiron të privohet ose jo nga vetë futbollisti kuqezi, i cili dëshiron të largohet në huazim te ndonjë skuadër që i garanton minuta në këmbët e tij.

Aktualisht në të gjitha kompeticionet me fanelën e Interit, Kristjan Asllani është aktivizuar në total në 8 ndeshje, duke mos shënuar dhe asistuar asnjë herë.

Sport Inter Kristjan Asllani mesfushori shqiptar