Franca nxitoi të përmbushte kërkesën e Shkupit për të modifikuar propozimin e sajë për heqjen e veto-s ndaj Maqedonisë së Veriut në ditën e fundit të presidencës .
Ndërkohë që ditën e sotme është Çekia ajo që merr presidencën e radhës të Bashkimit Europian, ku zgjerimi i bllokut nuk është lart në axhendën e listës së gjatë të prioriteteve të radhës për të udhëhequr Këshillin e Bashkimit Europian.
Presidenca çeke e Bashkimit Evropian, e cila sapo ka marrë mandatin 6-mujor është zotuar që t’i sigurojë Shqipërisë dhe Maqedonisë së Veriut hapjen e negociatave brenda këtij muaji.
Çekia në krye të listës do të ketë Ukrainën, dhe situatën e luftës atje. Duke u bërë kështu pas Polonisë, vendi i BE-së që mbështet më fort Kievin, ku ka dërguar armë dhe tanke, e ka strehuar rreth 350 mijë refugjatë ukrainas.
Por Çekia gjithashtu shpreson që gjatë presidencës së saj të ketë edhe përparim konkret rreth Ballkanit Perëndimor të nisin negociatat e anëtarësimit në BE me Shqipërinë dhe Maqedoninë e Veriut, si dhe të përmbyllet procesi i liberalizimit të vizave për Kosovën.
Sa i përket liberalizimit të vizave me Kosovën, Çekia, sipas burimeve diplomatike, është e gatshme që këtë vendim ta vendosë në rend të ditës, sapo të vërtetohet se ka gatishmëri nga vendet anëtare për heqjen e vizave.
Edhe pse në ditën e fundit të presidencës franceze, Parisi zyrtar nxitoi të përmbushte kërkesën e Shkupit për të modifikuar propozimin e tij për heqjen e veto-s ndaj Maqedonisë së Veriut, ashtu siç kishte kërkuar pala maqedonase, duke pranuar disa nga vërejtjet e saj. Arritja e një marrëveshjeje tani mbi këtë dokument, do t`i hapte rrugën zhbllokimit të procesit të integrimit evropian.
Kryeministri maqedonas, Dimitar Kovacevski tha se detajet e propozimit francez do të bëhen të ditura në ditët në vijim, por shtoi se aspektet historike një nga çështjet më të ndjeshme në kontestin me Sofjen nuk do të jenë pjesë e kornizës negociuese për anëtarësim në BE.
“Tashmë na mbërriti edhe zyrtarisht propozimi francez pas ndërhyrjes sonë javën e kaluar në Bruksel. Propozimi do të publikohet pasi të kalojë të gjitha filtrat në institucione. Do të pasoje një proces i gjerë në të cilin do të përfshihen edhe presidenti dhe opozita”, u shpreh Kovacevski.
