Politike28 Qershor 2018, 08:29

Negociatat vitin e ardhshëm, dyshja Berisha-Kryemadhi përgatiten për revolta, Basha kundërshton planin. Përplasjet mes tyre

Shkruar nga Pamfleti
Negociatat vitin e ardhshëm, dyshja Berisha-Kryemadhi përgatiten

Negociatat vitin e ardhshëm, dyshja Berisha-Kryemadhi përgatiten për revolta, Basha kundërshton planin. Përplasjet mes tyre

Bashkimi Europian ka vendosur të shtyjë negociatat me Shqipërinë në qershor të vitit të ardhshëm, por kjo gjë ka ndezur klasën politike në vendin tonë. Deputetët demokratë janë rreshtuar krah Berishës, por edhe ata tëLSI-së kanë rritur presionet ndaj Bashës që të nis revoltat kundër qeverisë. Dyshja Berisha-Kryemadhi po prisnin rezultatin negativ për t’u vënë në lëvizje.

Sipas ‘’SOT’’ Berisha dhe deputetët e Monës bënë thirrje për revolta, por një gjë e tillë nuk u pranua nga Basha. Mesa duket Saliu po kërkon të rikthehet në PD, por që kreu aktual i kësaj force politike po i del kundër. Duke u ndalur te vendimi i BE-së, ditën e djeshme Berisha nëpërmjet një postimi në rrjetet sociale u shpreh se ky vendim është thirrja më e fuqishme për çdo shqiptar për të çliruar vendin sa më shpejt nga narkoqeveria.

 “Ata që besuan se Edi Rama do të plotësonte 6 kushtet, dhe se tani pas dështimit të plotë ai do mund të plotësoje 13 kushtet, kanë humbur çdo lidhje me realitetin, vlerat dhe standardet e BE dhe janë shndërruar në skllevër të interesave të tyre më të ngushta dhe kockave që u hedh për të lëpirë piktori dështak. Por ky vendim është thirrja më e fuqishme për çdo shqiptar për të çliruar vendin sa më shpejtë nga narkoqeveria që ka bllokuar të ardhmen tyre europiane”, u shpreh ish-kryeministri Berisha.

Thirrjet e LSI

Ashtu si Berisha, të njëjtin qëndrim mbajti dje dhe LSI. Ish-ministri i Drejtësisë, Ylli Manjani përmes një komenti në rrjetet sociale, deklaroi se e vetmja mënyrë që të shpëtojë Shqipëria është largimi i qeverisë. “Shqipëria ka bërë progres të dukshëm. Por droga, krimi, korrupsioni dhe drejtësia e pamjaftueshme janë pengesë ende. E thënë thjesht Shqipëria është në rregull, por jo qeveria!

Në fakt, qeveria dështoi paq! Logjika ta do që të shpëtojë Shqipëria duket të largohet qeveria”, tha ai. Ndërsa nga ana tjetër, nënkryetari i LSI, Luan Rama, gjatë një deklarate për mediat, i bëri thirrje kryeministrit Rama që të largohet menjëherë nga qeveria.

“Kosto-ja dhe fatura e drejtpërdrejtë e gjithë këtij realiteti ka vetëm një fajtor; ky është kryeministri i vendit Edi Rama, i cili në shenjë reflektimi të përgjegjshëm, në shenjë serioziteti dhe nëse vërtet i ka mbetur sadopak ndjenjë përgjegjshmërie përballë interesave të vendit, duhet të japë dorëheqjen, të largohet një orë e më parë dhe të mos mbajë peng interesat europiane të Shqipërisë”, tha ai.

Kreu demokrat refuzon Berishën

Kreu i Partisë Demokratike, Lulzim Basha rrëzoi dje të gjithë skenarët për revolta dhe protesta kundrejt qeverisë. Ai mbajti një konferencë shtypi dhe teksa u pyet nga gazetarët se çfarë planesh ka tani PD, kreu demokrat ishte i qartë kur tha se e vetmja gjë që do të ndërmarrë PD është të informojë qytetarët mbi të vërtetën e negociatave, duke përjashtuar në këtë mënyrë gjithë skenarët e tjerë. “Plani i parë është të përballemi me të vërtetën, unë, ju në këtë sallë, Partia Demokratike, partitë e tjera opozitare, qytetarët shqiptarë, të përballemi me të vërtetën.

Pse na thanë jo? Pse nuk hapen negociatat? A hyn dot në Europë një vend që nuk bën dot zgjedhje të ndershme? A hyn dot në Europë një vend që i ka ministrat e Brendshëm njëri pas tjetrit të lidhur me drogën dhe me baronët e drogës?”, tha ai. Basha u pyet nga gazetarët drejtpërdrejt nëse PD do e bojkotojë Parlamentin, një kërkesë e vazhdueshme kjo e Berishës. Edhe pak ditë më parë ish-kryeministri e tha hapur se nuk duhet të qëndrohet më në Parlament.

Basha dha sinjale se kjo nuk do të ndodhë. “Unë e di që ju doni të nxirrni një lajm tjetër sot. Por unë po ju them edhe njëherë se lajmi sot është ky, jo ai që kanë porositur qeveritarët në ekranet e kapura e të fashuara me paratë e krimit e të drogës, të korrupsionit dhe të lejeve të ndërtimit, pra është ky: Që Shqipërisë nuk i hapen negociatat se nuk ka bërë detyrat e shtëpisë”, tha ai.

Politike Lulzim Basha Monika Kryemadhi Saki Berisha