Shkruar nga Pamfleti
Nejmar mungon në ceremoninë e varrimit të Pele, i gjithë Brazili kundër sulmuesit: T’i bënte presion PSG-së siç bën për festat
Sulmuesi brazilian Nejmar kthehet përsëri në qendrën e vëmendjes dhe këtë radhë për mungesën e tij të pashpjegueshme në homazhet e legjendës braziliane Pele. Të gjithë ishin të sigurt se ai nuk do të mungonte, pasi ishte lideri i “Seleçaos” dhe për çdo futbollist të përfaqësueses, figura e Pele është një pikë reference.
Por Nejmar ka munguar në ceremonitë e zhvilluara dje në stadiumin e Santos dhe kjo ka bërë që ai të kritikohet nga të gjithë në Brazil, pasi është e pakuptueshme se si kishte shmangur një ceremoni të tillë domethënëse për popullin brazilian mbi të gjitha.
Në emisionin televiziv “Brasil Urgente”, prezantuesi Zhoze Luiz Datena, nuk ngurroi ta kritikonte publikisht mungesën e tij në homazhet për Pele. Të gjithë mendonin se Nejmar duhej t’i bënte presion PSG-së që ta lejonte të udhëtonte drejt Brazilit, por tashmë duket e qartë se ai nuk shfrytëzoi as ditën e pushimit që i ishte dhënë nga klubi për ta bërë një gjë të tillë.
“Nëse Nejmar do të dëshironte të vinte, do të kishte ardhur. Nejmar mund t’i bënte presion PSG-së që të vinte këtu. Ai e ka bërë shpesh një gjë të tillë për të ardhur për festa, pse të mos ia kërkonte PSG-së edhe për t’i dhënë lamtumirën e fundit Pele. Mendoj se Nejmar, si futbollist brazilian, kishte detyrimin që të vinte për nderimet e Pele. Ishte diçka e rëndësishme për futbollin brazilian”, shpërtheu në kritika prezantuesi, fjalë që janë shpërndarë gjerësisht në rrjetet sociale me të gjithë që kritikojnë yllin e futbollit për veprimin e tij.
Babai i Nejmar, Nejmar Sr tha: “Sot është për të mbështetur familjen, ne kemi humbur shumë. Ai frymëzoi shumë njerëz dhe sport, na solli këtu sot. Ai ka frymëzuar të gjithë brezat, ka qenë gjithmonë referencë.
“Kjo është arsyeja pse djali im më kërkoi të isha këtu. Për të përfaqësuar familjen. Ne e dimë se çfarë është të humbasësh dikë dhe nuk kemi humbur vetëm një sportist, kemi humbur një qytetar, Pelen. Jo, Nejmar nuk do të vijë.”
