Grupi i Rithemelimit të PD, në Shkodër, ka depozituar emrat e kandidatëve për primaret në Bashkinë e Shkodrës. Kandidatët potencialë për Bashkinë e Shkodrës kanë plotësuar dokumentacionin e kërkuar dhe formularin tip që është kërkuar nga grupi drejtues i mbështetësve të ish-kryeministri Sali Berisha.
Ashtu siç pritej, dy emrat potencialë në listë janë ish zv/Ministri i Shëndetësisë Bardh Spahia, i cili vjen në këtë garë vjen me stofin e kandidatit më të votuar në zgjedhjet e 25 Prillit, por nuk e mori dot mandatit për shkak se ishte renditur i shtati në listë. Ndërkohë që emri tjetër ashtu siç flitej, është edhe ai i kryetares aktuale të Bashkisë së Shkodrës Voltana Ademi.
Ndërkohë emrat e tjerë janë ato ish-kryetarit të Bashkisë Lorenc Luka, ish-deputeti Astrit Bushati, N/Kryetarja e PD Shkodër Irena Shestani, N/Kryetari i Bashkisë Shkodër Ardit Qylybyli.
Të gjithë kandidatët kanë depozituar dokumentat e kërkuara, bashkë me formularin TIP që iu ishte dorëzuar.
Pas shqyrtimit të emrave, pritet që në datën 30 Janar, për anëtarët e PD të vijnë edhe kandidaturat të cilat do të votohen nga demokratët e Shkodrës për të zgjedhur edhe emrin e kandidatit që do të garojë në zgjedhjet e pjesshme të 6 Marsit në Bashkinë Shkodër.
Mbetet për t’u parë se cili do të jetë qëndrimi që do të mbajë Lulzim Basha për garën e Shkodrës, nëse do të dalë me një emër të ndryshëm nga Berisha, duke rrezikuar kështu humbjen e të vetmes bashki që është qeverisur në këto vite nga të djathtët.
Në zgjedhjet e 6 Marsit, qytetarët në 6 Bashki të vendit do të zgjedhin drejtuesit e tyre, duke filluar nga Shkodra, Vau i Dejës, Vora, Durrësi, Lushnja dhe Rrogozhina.
