Shumë sportistë në mbarë botën japin donacione për bamirësi, ose marrin pjesë në evente që nëpërmjet imazhit të tyre gjenerohen të ardhura për kauza humane.
Piloti britanik, Ljuis Hamilton, 7 herë kampion bote në Formula 1, është një person mjaft i ndjeshëm për çështjet jashtë këtij sporti. E përditshmja britanike “The Sun”, e ka cilësuar pilotin e Mercedes si “Sportistin më Bujar në Mbretërinë e Bashkuar”.
Sipas të dhënave të publikuara nga “Charities Aid Foundation”, Hamilton ka dhuruar deri më tani 23 milionë euro (20 milionë stërlina) vetëm në muajt e fundit. Ai ka krijuar shpesh programe që synojnë të ndihmojnë të rinjtë me ngjyrë, madje duke i afruar në botën e automobilizmit.
Hamilton ka një pasuri që e kalon shumën e 300 milionë stërlinave, çka do të thotë se ai ka dhënë në bamirësi rreth 7% të të ardhurave. Në vendin e dytë të sportistëve më bujarë në Mbretërinë e Bashkuar renditet Mohamed Salah.
