Aleksandër Vuçiç ka shpallur një ofensivë të egër në veri të Kosovës dhe në Preshevë për të zvogëluar siç tha ai “presionin e administratës së re amerikane” në njohjen e Kosovës.
Portali rus ‘Sputnik’, duke ju referuar mbledhjes së kryesisë së Partisë Progresiste Serbe SNS thekson se Vuçiç, ka nisur një plan për të serbizuar Preshevën dhe për të blinduar Mitrovicën, në rast se Uashigntoni i kërkon shpejt e shpejt njohjen e shtetit të Kosovës.
“Albin Kurti po flet se si do të flasë me serbët e Kosovës, duke injoruar Listën serbe ndaj ne duhet të marrim masa të menjëhershme. Presioni i përbashkët i SHBA dhe BE mbi vendin tonë pritet të përmbushë kërkesën në lidhje me, siç thonë hapur amerikanët – njohjen e Kosovës. BE do të përdorë një fjalor paksa të ndryshëm, por po shkon drejt të njëjtit qëllim”, tha Vuçiç.
Ai vuri në dukje se do të ketë presion mbi çështjen e Republika Srpska gjithashtu.
E pikërisht për këtë Vuçiç ka shpallur se në Preshevë qeveria dhe pushteti serb do të zhvillojë një presion të jashtëzakonshëm, duke krijuar një aleancë serbe që të mundë partitë shqiptare në zgjedhjet që do të mbahen në mars.
Ndërkohë, në veriun e Kosovës, Vuçiç ka vendosur të hapë thesin e të shpërndajë para që të sigurojë një ushtri që të krijojë rezistencë ndaj një plani të shpejtë nga SHBA e BE.
Vuçiç deklaroi se Serbia po përballet me një periudhë shumë të vështirë, gjatë së cilës do të ketë presione të ndryshme nga të gjitha palët, kryesisht mbi çështjen e Kosovës e Metohisë, duke deklaruar se pret presion të përbashkët nga SHBA dhe BE që Serbia të njohë Kosovën.
Përfaqësuesi Special i BE për Dialogun Beograd-Prishtinë Miroslav Lajcak do të jetë në Beograd në 3 dhe 4 Mars. Ai do të mbërrijë në Beograd nga Prishtina, ku do të qëndrojë nga 1 deri më 3 Mars.
Të Mërkurën pasdite, 3 Mars, Lajcak do të bisedojë me Presidentin e Serbisë, Aleksandër Vuçiç dhe pritet që pas takimit, të dy ata t’i drejtohen publikut.
Nga Beogradi, Miroslav Lajçak niset për në Podgoricë në 4 mars.
Sot, Vuçiç thirri në Presidencë përfaqësuesit e Listës Serbe dhe i bëri të ditur se do të duhet të mos lejojnë asnjë zhvillim tjetër politik që do të pranojë “kolaboracionizmin” me Albin Kurtin. Kjo tregon në mënyrë të qartë se dhuna ndaj djalit të Nenad Rashiçit, serbit të moderuar të Kosovës ka qenë vepër direkte e Beogradit.
Por përveç kërbaçit, Vuçiç ka nxjerrë dhe karrotën. Kështu Beogradi do të investojnë një autostradë nga pika doganore e Jarinjës deri në Mitrovicën e Veriut, por edhe para për çdo qytetar që jeton në veri dhe që kundërshton Prishtinën.
Kështu është akorduar 200 euro për çdo serb të veriut të Kosovës që është i papunë, ndërkohë që çdo fëmijë do marrë 100 euro në muaj ndihmë ekonomike.
“Kjo do të thotë që një familje me pesë anëtarë, do të marrë 500 euro, dhe nëse prindërit janë të papunë, 700 euro”, tha Vuçiç.
Presidenti serb ka kërkuar që partitë serbe duhet të fitojnë dy vende më shumë në Këshillin Komunal në Zgjedhjet lokale të 28 marsit për të siguruar shumicën dhe rrëzuar qeverisjen e shqiptarëve në Luginë.
“Ky do të ishte një sukses historik në Preshevë,” tha Vuçiç./Pamfleti
