Deputeti Erion Braçe ka reaguar në lidhje me lajmin se numri 1 i tenisit në botë, Novak Xhokoviç, ka marrë sipas tij dënimin e merituar nga autoritetet australiane, pasi mashtroi me historinë e tij me COVID-19. Braçe shkruan se askush nuk është mbi rregullat në Australi dhe bën një paralelizëm me situatën se si sillen ‘vipat shqiptarë’.
Postimi i Braçes
Vip-i pa vaksinë kthehet në Serbi, sepse ligji nuk e njeh vipllëkun! Numri 1 i tenisit në botë dhe hero kombëtar në Serbi,-nga këta që ai vend i shpall çdo muaj, ishte i pa vaksinuar, për pasojë në kundërshtim me ligjin e rregullat në Australi! Pikë dhe kaq!
Po këtu? Këtu vipllëku është përtej ligjit, rregullave; këtu VIP-at i bëjnë vetë rregullat e sëmundjes; lexojnë aq shumë sa plasin dhe e vendosin vetë, individualisht si VIP apo në grup si VIP-a, se si përballen me sëmundjen.
Nuk ka rëndësi në janë këngëtarë, aktorë, gastorë, prezentatorë apo politikanë, nuk ka rëndësi që janë në festa apo protesta, ata janë VIP-a dhe janë mbi ligjin e rregullat! Aaaa po, rëndësi ka që ata i thonë popullit: Për ju ka rregulla te tjera!
Dhe pasoja: Të premte- 2.179 të infektuar dhe 7 të vdekur; të shtunë- 2.163 të infektuar dhe 3 të vdekur. Dhe nuk ka mbaruar; të infektuarit e sotëm janë ata të festave të ndaluara e mitingjeve të lejuara të fundvitit; tani prisni valën e festave, mitingjeve e protestave të kësaj jave!
