Janë mbyllur 5 përballjet e luajtura për Turin e Parë të Kupës së Shqipërisë në Grupin A.
Teuta, Partizani, Tirana, Skënderbeu dhe Korabi janë 5 skuadrat e kualifikuara deri më tani, ndërsa ditën e nesërme do të luhen dhe 3 sfida për këtë grup. Dinamo do të ndeshet me Erzenin, Bylisi pret në shtëpi Orikun, ndërsa Burreli do të sfidojë Besëlidhjen.
Në Grupin B është kualifikuar Vllaznia, Laçi, Kukësi, Egnatia, Pogradeci, Kastrioti dhe Flamurtari, ndërsa ditën e nesërme do të luhet dhe ndeshja e fundit për këtë grup ku Tomori do të presë Lushnjen.
Vllaznia triumfoi 4-0 ndaj Labërisë dhe zhvlerësoi humbjen 2-1 në ndeshjen e parë, duke vijuar më tej aventurën në fazën e 1/8-ave.
Edhe pse kishte siguruar kualifikimin që në ndeshjen e parë, Tirana nuk e nënvlerësoi aspak përballjen me Shkumbinin dhe arriti të shënojë plot 6 herë brenda 45 minutave të para, për të vijuar më tej me rezultatin e përgjithshëm 9-0.
Fituan me goleada edhe Skënderbeu, 4-0 ndaj Veleçikut dhe Partizani 3-0 ndaj Tërbunit, ndonëse edhe këto dy skuadra kishin vulosur kualifikimin që në ndeshjen e parë. Ia doli të avancojë më tej edhe Korabi, që pas humbjes 2-1 në Vorë, përmbysi gjithçka në Peshkopi me fitoren 4-1, ndërsa Teuta e Luzi u ndanë në barazim 2-2, por bregdetarët avancuan më tej falë fitores 4-1 në ndeshjen e parë.
Me një gol në sekondat e fundit, ia doli të kualifikohet edhe Egnatia, që pas barazimit 1-1 në ndeshjen e parë ndaj Turbinës, fitoi 1-0 në Rrogozhinë, ndërsa Kastrioti fitoi edhe ndeshjen e dytë ndaj Elbasanit, sërish me shifrat 2-0.
Rezultatet e Kupës së Shqipërisë:
GRUPI A
Teuta-Luzi 2-2
Partizani-Tërbuni 3-0
Tirana-Shkumbini 6-0
Skënderbeu-Veleçiku 4-0
Korabi-Vora 4-1
GRUPI B
Vllaznia-Labëria 4-0
Laçi-Butrinti 4-0
Kukësi-Maliqi 4-0
Kastrioti-Elbasani 1-0
Apolonia-Flamurtari 1-1
Egnatia-Turbina 1-0
Pogradeci-Besa 2-0
