Së fundmi Policia e Shtetit ka hedhur poshtë lajmet se i riu, Stiverjan Dashi i cili shkaktoi aksidentin pranë ambasadës italiane ditë më parë është familjar i një zyrtari drejtues në Polici.
Ndër të tjera në sqarimin e saj, policia thekson se drejtuesi i mjetit që shkaktoi aksidentin rrugor “nuk është i afërm i ndonjë zyrtari drejtues në Policinë e Shtetit dhe nuk është favorizuar në asnjë moment nga asnjë zyrtar policie. Gjithashtu policia thotë se në lidhje me këtë ngjarje janë kryer të gjitha veprimet procedurale dhe materialet janë referuar në Prokurori për veprime të mëtejshme, në ngarkim të qytetarit Stiverjan Dashit.
Ky sqarim u bë nga ana e policisë pasi në media u raportua se i riu ka shpëtuar nga burgu duke marrë vetëm një gjobë pasi kishte lidhje me një person që mban post të lartë në institucionet ligjvënëse.
SQARIMI NGA POLICIA:
Në lidhje me lajmin e publikuar në disa media përgjatë ditëve të fundit, për një aksident rrugor të ndodhur në kryqëzimin e rrugës “Papa Gjon Pali II” me rrugën “Ismail Qemali”, ku shtetasi S.D., duke vazhduar lëvizjen me mjet gjatë kohës që semafori ishte me dritë të kuqe dhe është përplasur me mjetin tip “Skoda Rapid”, me drejtues shtetasin D.T. dhe pasagjer shtetasin A.M. e për pasojë u dëmtuan 2 shtetas, jashtë rrezikut për jetën, sqarojmë opinion publik se:Drejtuesi i mjetit që shkaktoi aksidentin rrugor nuk është i afërm i ndonjë zyrtari drejtues në Policinë e Shtetit dhe nuk është favorizuar në asnjë moment nga asnjë zyrtar policie.Stukturat hetimore të Drejtorisë Vendore të Policisë Tiranë, në lidhje me këtë ngjarje kanë kryer të gjitha veprimet procedurale dhe materialet janë referuar në Prokurori për veprime të mëtejshme, në ngarkim të qytetarit S.D.Njëkohësisht, Policia Rrugore e Tiranës ka kryer të gjitha veprimet administrative.Njoftimi për aksidentin rrugor është pasqyruar në faqen zyrtare të Policisë së Shtetit, në përmbledhjen ditore të ngjarjeve që publikohet, si çdo ngjarje tjetër pa pasoja fatale.Policia e Shtetit garanton qytetarët se është tërësisht e angazhuar për të luftuar krimin dhe zbatuar ligjin dhe vetëm ligjin, ndaj fton median që për çdo rast të kërkojë informacion zyrtar pranë strukturave përgjegjëse për dhënien e informacionit.
