Detaje të reja nga incidenti në Dukagjin, ku një oficer policie ra në humnerë gjatë një operacioni antidrogë.
Nga të dhënat paraprake bëhet me dije se nënkomisari i Shkodrës, Rrok Frroku është nxjerrë pas 24 orësh nga humnera në fshatin Shosh të Dukagjinit.
Mësohet se efektivi për shkak të terrenit të thepisur ka rrëshqitur në humnerë mesditën e së premtes dhe nxjerrja e tij është bërë e mundur vetëm sot. 54-vjeçari ka marrë lëndime në trup dhe është nën monitorimin e mjekëve në vendngjarje.
Shërbimet e policisë së bashku me disa grupe të RENEA-S, kanë bërë të mundur nxjerrjen Rrok Frrokut deri në një pikë ku mund të ulet helikopteri apo të bëhet tërheqja e tij me litarë. Pritet që të mbërrijë helikopteri për transportimin e tij drejt spitalit të Traumës në Tiranë, pasi “nga pika fundore e rrugës që shkon automjeti deri në vendin ku aktualisht ndodhet punonjësi i Policisë i dëmtuar, është 6 orë me këmbë dhe një terren shumë i vështirë që e bën të pamundur transportimin me krahë, të tij”.
“Me datë 27.05.2022, rreth orës 12:00, në një zonë malore të fshatit Shosh, Dukagjin gjatë kontrollit në terren, në kuadër të planit të masave për kontrollin e territorit, për goditjen e veprimtarisë kriminale të kultivimit të bimëve narkotike, njëri nga efektivët e grupit të kontrollit, konkretisht Nënkomisar Rr. F., 54 vjeç, si pasojë e terrenit mjaft të thepisur, është rrëzuar dhe ka rënë në humnerë.
Për pasojë, shtetasi Rr. F. ka marrë lëndime të shumta në trup.
Shërbimet e Policisë dhe disa grupe të RENEA-s, në bashkëpunim me shërbimet mjekësore pranë Spitalit Rajonal Shkodër, nën drejtimin e Drejtorit të Policisë Shkodër, pas 24 orë përpjekjesh, kanë bërë të mundur nxjerrjen nga humnera të efektivit të Policisë, deri në një pikë ku mund të ulet helikopteri apo të bëhet tërheqja e tij me litarë, me qëllim transportimin e tij drejt Tiranës, për ndihmë mjekësore.
Ekipi i urgjencës mjekësore i ka dhënë ndihmën e pare oficerit të Policisë dhe po e mban nën monitorim, së bashku me shërbimet policore, deri në mbërritjen e helikopterit, pasi transportimi i mëtejshëm nga shërbimet e Policisë, zjarrfikësit dhe shërbimet e urgjencës mjekësore është i pamundur, për shkak të terrenit shumë të vështirë.
Nga pika fundore e rrugës që shkon automjeti deri në vendin ku aktualisht ndodhet punonjësi i Policisë i dëmtuar, është 6 orë me këmbë dhe një terren shumë i vështirë që e bën të pamundur transportimin me krahë, të punonjësit të Policisë”- thuhet në njoftim.
