Pas Taulant Ballës, një tjetër deputet socialist ka komentuar protestën e zhvilluar mbrëmjen e sotme nga opozita. Përmes një mesazhi në rrjetet sociale, Petro Koçi shkruan se kjo “luftë” po bëhet për interesat personale të Sali Berishës.
Sipas Koçit, tubimi i Berishës po zhvillohet paralelisht me protestat e serbëve në veri të Kosovës.
“Fjalori politik i opozitës që përmblidhet nga kriminaliteti historik i PD dhe korrupsioni historik i LSI është më i varfër se ai i vitit ’90”- tha Koçi duke shtuar se kjo opozitë nuk ofron asnjë shpresë.
“Protesta e sotme demostroi se opozita sundohet nga interesat personale të Sali Berishës dhe se shanset që kjo opozitë të transformohet e modernizohet janë thuajse zero. Fundi i protestës na beri të ditur se tashmë organizatoret e kanë frike shtetin ligjor dhe penalitetet ndaj atyre që shkelin ligjin dhe rendin publik. Ndërkohë kjo lëvizje e opozitës zhvillohet paralel me lëvizjen politike të serbëve të Kosovës. Fjalori politik i opozitës që përmblidhet nga kriminaliteti historik i PD dhe korrupsioni historik i LSI është më i varfër se ai i vitit ’90.
Kjo opozite nuk ofron shpresë. E shumta që tenton është vetëm nxitja e urrejtjes politike ndaj kundërshtarëve. Lidershipi i opozitës është i kompromentuar me përcaktime zyrtare si ‘Non Grata’ për shkak të korrupsionit përmbytës. Nga ana tjetër maxhoranca jonë duhet të vazhdoje reformat, të shkunde administratën dhe të vërë në shënjestër korrupsionin e kësaj administrate.
Sistemi i drejtësisë nuk ka pse pret më shume për të hetuar e ndëshkuar financimet ruse dhe sjelljet tradhtare të Berishës ndaj UCK-së që kulmojnë me bashkimin e votave të PD me Kozacevin në Këshillin e Europës”, shkruan Koçi.