Politike23 Qershor 2022, 12:22

Olta Xhaçka i del në mbrojtje bashkëshortit: Im shoq nuk ka shkelur asnjë ligj, e ka nisur biznesin si emigrant në Itali!

Shkruar nga Pamfleti
Olta Xhaçka i del në mbrojtje bashkëshortit: Im shoq nuk ka

Ministrja e Jashtme Olta Xhaçka flet në Kuvend lidhur me bashkëshortin e saj se ka përfituar para publike përmes projekteve qeveritare për investimet strategjike.

Ministrja e Jashtme, Olta Xhaçka ka mohuar në Kuvend se ajo apo familja e saj ka shkelur ligjin për investimet strategjike, pas akuzave të deputetit Agron Shehaj.

“Përgjigja e shkurtër është që jo, nuk kam shkelur asnjë ligj as unë, as bashkëshorti im, as qeveria, as kryeministri e askush. Nuk jam në konflikt interesi as unë e askush. Këtë e dinë mirë edhe kolegët e opozitës, edhe kolegu që i ka hipur kësaj furtune në gotë si ta kishte kalë beteje. Bashkëshorti im zgjodhi rrugën të merret me biznes shumë përpara se të hynte në politikë e jo pse unë u bëra deputete e ministre.

E ka nisur biznesin si emigrant në Itali, njësoj si deputeti që e ka marrë me kaq pasion këtë kauzë opozitare dhe pas 30 vitesh biznes ëhstë angazhuar me të gjitha vështirësite dhe rrisqet që paraqet sot të bëjë një investim serioz hotel me 5 yje në jug.

Nuk është përfitues i asnjë qindarke nga fondet publike dhe asnjë metër truall pronë publike për ndërtimin e këtij hoteli.”, tha Xhaçka.

Demokratët pretendojnë se Olta Xhaçka është në konflikt interesi, pasi bashkëshorti i saj, Artan Gaçi ka përfituar favore duke u shpallur investitor strategjik.

“Kompania e krijuar menjëherë pas miratimit të ligjit për investimet strategjike AG. TCC shpk në pronësi të bashkëshortit të ministres dhe deputetes znj. Olta Xhacka, ka përfituar statusin e investitorit strategjik për ndërtimin e një hoteli disa katësh me 5 yje në një sipërfaqe zhvillimi prej 10,592 m² dhe me vlerë rreth 5,5 milion euro, në Gjilekë, Bashkia Himar. Shoqëria në pronësi të bashkëshortit të ministres dhe deputetes znj. Olta Xhacka ka përfituar masën mbështetëse të lejimit të përdorimit të bregut para hotelit për një periudhë 30 vjeçare, si dhe përfiton nga incentiva e reduktimit të TVSH-së”, pretendojnë demokratët.

Mbledhja e Këshillit të Mandateve do të mbahet në orën 10.30, ndërsa pritet të jetë e karakterit formal, pasi çështja duhet që të shkojë në Gjykatën Kushtetuese.

Politike #OltaXhaçka ArtanGaçi PD