Agjencia e Mbikëqyrjes Policore ka reaguar pas sulmeve të opozitës se operacioni i djeshëm i SPAK u dekonspirua.
Përmes një njoftimi për mediat, Agjencia e Mbikëqyrjes Policore thekson se në operacion u caktuan dhe ekzekutuan masat e sigurimit personal të karakterit shtrëngues “Arrest në burg” për 32 shtetas, mes tyre edhe një punonjës policie. Megjithatë, po verifikohet çdo dyshim për rrjedhje informacioni.
“Agjencia e Mbikëqyrjes Policore (AMP) po verifikon çdo dyshim nëse ka pasur rrjedhje informacioni, gjatë operacionit të zhvilluar nga Prokuroria e Posaçme Kundër Korrupsionit dhe Krimit të Organizuar dhe Policia e Shtetit, në kuadër të procedimit penal nr.75/2022, përmes të cilit u caktuan dhe ekzekutuan masat e sigurimit personal të karakterit shtrëngues “Arrest në burg” për 32 shtetas, mes tyre edhe një punonjës policie.
Në përfundim të këtij operacioni, Agjencia e Mbikëqyrjes Policore siguron opinionin publik dhe mediat se do të hetojë me seriozitetin maksimal çdo dyshim për rrjedhje të mundshme të informacionit nga punonjës të policisë, si edhe çdo përfshirje nëse ka, në aktivitete të paligjshme.
AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të Policisë së Shtetit, duke telefonuar në numrin e gjelbër 0800 9090″– thuhet në njoftim.
Vlen të theksohet se, Sali Berisha dhe Presidenti Ilir Meta kanë hedhur akuza për dekonspirim të operacionit duke thënë se ‘nga tetë bosët e shpallur në kërkim, vetëm një prej tyre u arrestua’.
