Komisioni i Ekonomisë ka miratuar sot mes debatesh draftin që i hap rrugë menaxhimit të Parkut të Butrinti nga një fondacion.
Ditën e enjte pritet që ligji të kalojë në seancë plenare dhe PS do i hapë rrugë kësaj marrëveshje. Por duket se opozita nuk do të ndalet me kaq, pasi ka paralajmëruar dërgimin e marrëveshjes në Kushtetuese.
“Ju doni përsëri sot të kaloni një ligj i cili do të atakohet në Gjykatën Kushtetuese nëse e kaloni kështu siç është sepse është në kundërshtim me Konventën e Parisit. Është një model i cili ua garantoj që do të shkojë në Gjykatën Kushtetuese dhe ky ligj nëse e miratoni kështu siç e keni do t’ju rrëzohet, siç u rrëzua edhe vendimmarrja e Teatrit. Ju lutem mos e votoni”, u shpreh deputetja Ina Zhupa, deputete e PD-së.
Në komision, deputeti socialist Erion Braçe kërkoi nga qeveria që të garantojë me ligj se zona e mbrojtur në parkun e Butrintit nuk do të preket nga ndërtimet.
“Për të mbrojtur marrëveshjen, peizazhin nga interesi dhe presioni I shtuar po bëj këtë propozim që me ligj qeveria të ngarkohet për të garantuar kufijtë e parkut kombëtar të parkut të Butrintit zonë e mbrojtur. Pa këtë do kthehet shumë shpejt si Amfiteatri i Durrësit. Në dijeninë time të paktën në një rast parku Kombëtar I Butrintit zonë e mbrojtur është cenuar. Ça ndodhi, a ka mundësi më të mos cenohet më. Sepse vërtetë themi interes strategjik po të shkoj të ndërtoj një hotel e kam të vështirë ta mendoj”, tha ai.
