Sali Berisha: Ilir Meta ka zhdukur njerëz pas Malit të Dajtit, shëtiste me helikopter alpeve të Shqipërisë me Tom Doshin, më pas urdhëroi ta eliminonin. (A do t’i administrojë SPAK këto dëshmi?)
Një nga njohësit më të thellë të Ilir Metës dhe veprimtarisë së tij me natyrë mafioze, është padyshim Sali Berisha. Për 30 vite me radhë, Berisha dhe Meta kanë kaluar nga aleanca në armiqësi dhe anasjelltas, por raporti mes tyre dominohet më shumë nga bashkëpunimi për pushtet, interesa financiare, pazare, për kontrollin e drejtësisë dhe mbrojtjen reciproke të tyre, familjarëve dhe pasurive të paligjshme nga veprimi i drejtësisë.
Në momente të caktuara të karrierës së tij politike, Sali Berisha ka shprehur opinionet e tij për Ilir Metën, ndërsa ky i fundit i është përgjigjur po aq ashpër, duke urdhëruar deri edhe arrestimin e Berishës dhe para 5 viteve e shantazhoi me një video-skandal për të birin.
Në vitin 2015, Berisha dhe Meta patën një përplasje të ashpër. Berisha e akuzonte Metën se kishte porositur vrasjen e dy deputetëve, Tom Doshit dhe Mhill Fufit. Akuzat mes tyre kaluan vijën e kuqe, të cilën dyshja ishte kujdesur të mos e prekte ndër vite.
Sipas Berishës, Ilir Meta është koka më qelbur e krimit dhe korrupsionit në Shqipëri dhe Evropë. Berisha shprehej se mund të fliste gjithë ditën për krimet e Ilir Metës dhe për lidhjet e tij me krimin, ndërsa sipas tij, Meta e shëtiste me helikopter Tom Doshin, një tjetër kokë kriminale në Shqipëri.
“Mund të flasësh gjithë ditën për krimin dhe lidhjet tuaja me krimin. Je kokë e qelbur! Ajo kokë e qelbur që qëndron në krye të parlamentit, po kundërmon sot jo vetëm në Shqipëri, por në Evropë dhe në botë. Ilir Meta është problemi, sepse ai është akuzuar për dy vrasje. Për mua je 100% i përfshirë. E di ti si është Tom Doshi apo jo? Njeriu që ti e merrje me helikopter dhe fluturoje Alpeve… Tom Doshin e merrje me helikopter qeveritar dhe shtroje dreka e darka…”, shprehet Berisha.
Në një tjetër rast, Sali Berisha e akuzon Ilir Metën se ka zhdukur njerëz pas Malit të Dajtit dhe se fundi i tij do të ishte në burg.
“Për PD, Ilir Meta është njeriu që përfaqëson klanin më të rrezikshëm të trafiqeve në Shqipëri, të trafikut të drogës, të trafikut të fëmijëve dhe të trafikut të vajzave të mitura. Në historinë e vendit, ky mbetet njeriu që me bandat e tij, ngjiti Shqipërinë në krye të listës së vendeve të planetit, të trafiqeve të skllavërisë së seksit, të fëmijëve të drogës dhe armëve. Mbi këta të dy (për Ilir Metën dhe bashkëshorten e tij) rëndojnë dy varre dhe dy krime të fshehura pas malit të Dajtit. Nuk do të jetë e largët dita kur Ilir Meta do ta mbyllë jetën e tij pas hekurave të burgjeve”.
Sali Berisha ka denoncuar për herë të parë edhe vjedhjen e thesarit të shtetit në Kërrabë nga Ilir Meta. Nga ky denoncim e ka burimin edhe termi ‘Ilir Floriri’.
“Është e thjeshtë t’u thuash shqiptarëve se Leka Zogu mori thesarin, po edhe qeveria juaj e mori thesarin, dhe e mori atë më 28.12.1999, dhe e mori atë të tërin nga data 28 dhjetor deri në datën 22 prill. Shkoni e gjeni një monedhë, a jua la monedhat aty. Ju mendoni se duke penguar mbretin të vijë, duke gjetur mejdanoistë dhe të shtirë për të vendosur nëpër komisione, kështu do t‘i shpëtoni ligjit. Absolutisht jo, ligji do të jetë i fortë dhe unë jua kam provuar juve mirë se di të ndërtoj ligje dhe shtet. Në një moment të caktuar bëra një kompromis politik, për të cilin unë nuk jam i penduar, sepse të jeni të sigurt se kohërat e Çaushëve nuk kthehen më në Shqipëri dhe se këta mamuthë si Anastas Angjeli, që vjedhin ditën dhe natën me naftën e tyre, ata që bëjnë trafikun e hekurit, të tjerët që trafikojnë drogën, të gjithë pa përjashtim do ta gjejnë veten, pas gjyqit publik në gjykatë, aty ku e kanë vendin”.
Sot Sali Berisha dhe Ilir Meta janë bashkuar në një aleancë që nga viti 2017, ndërsa janë pjesë e një fronti kundër reformës në Drejtësi dhe misionit të SHBA-BE në Shqipëri. Nuk dihet nëse një ditë SPAK dhe Byroja Kombëtare e Hetimit do t’i administrojë këto akuza të rënda që Sali Berisha ka bërë ndër vite ndaj Ilir Metës, për grabitje, vrasje dhe korrupsion./Pamfleti
