10 vjet pas ndarjes nga jeta, Kryeministri Rama i ka dhënë katër të vrarëve gjatë protestave të 21 janarit 2011, titullin ‘Dëshmorë të Atdheut’
PS bën të njëjtin premtim, pas 10 viteve nga tragjedia e 21 Janarit 2011, protesta ku mbetën të vrarë 4 protestues dhe disa të plagosur.
Kryeministri Rama, në një deklaratë para mediave dhe para familajrëve të protestuesve të vrarë në 21 Janar 2011, se drejtësia ende nuk e ka kryer detyrën e saj për të dhënë drejtësi, për pjesëmarrësit në atë tragjedi. Por, theksoi se janë në rrugën e duhur me reformimin e sistemit.
“4 të vrarët e 21 Janarit, 10 vjet pasi janë ndarë nga jeta nuk prehen të qetë. Ashtu sikundër të gjithë familjarët dhe të afërmit e tyre, sa herë që ajo plagë dhemb, nuk kanë sesi të marrin frymë të lehtësuar, të paktën nga fakti që duhet bërë drejtësi”, tha Rama.
Rama tha se reforma në drejtësi dhe vetingu janë ato që do të sjellin drejtësi në vend.
“Vetingu është filtri për të siguruar që drejtësia e re është e pastruar nga metastazat e një kanceri.Do të jetë faza tjetër, ajo e sistemit të pastruar nga kanceri që do të realizojë atë që njerëzit presin me padurim: goditjen e të gjithë atyre që morën peng drejtësinë për vite të tëra.”
Pjesë nga fjala e Kryeministrit:
Unë jam shumë i vetëdijeshëm se sa herë flitet për 21 janarin, ka shumë zemra të lënduara dhe mendje të trazuara, nga ajo tragjedi, që për hir të së vërtetës ishte rezultat i një barbarie të papërputhshme me kontinenin ku ne jetojmë.
Drejtësia ende sot nuk e ka kryer detyrën e vetë për të vënë në vend secilin nga pjesëmarrësit në atë tragjedi. Për të vënë në vend të drejtën e padiskutueshme të të gjithë të afërmve, fëmijëve, prindërve, motrave dhe vëllezërve,dhe përtej tyre, të 4 dëshmorëve të 21 Janarit.
Për të vënë në vend atë që në fund të fundit e materializon një proces drejtësie: Të drejtën e reflektuar te ndëshkimet. Ky nuk është një justifikim, është e vërteta. Ajo që e dallon këtë të vërtetë të thënë nga ne, është se ne nuk kemi ndenjur duarkryq. Përkundrazi. Jemi ne që kemi përgjegjësi dhe detyrimin për të siguruar të gjithë ngrehinën ligjore dhe rregullatore të një sistemi drejtësie që të jetë në gjendje të bëjë atë që njerëzit kërkojnë për 21 janarin dhe jo vetëm.
Sistemi i drejtësisë është larg së qenit një sistem drejtësie që bën drejtësi dhe garanton barazi për të gjithë. Jemi ne që vijmë nga rruga e kësaj tragjedie, që është vendosur jo thjeshtë në program, por në rrugën e zgjidhjes, problemin e madh të çlirimit të drjetësisë. Të krijimit në vendin tonë të një drejtësie të denjë për njëj shtet funksional.
Nëse e shohim 21 janarin me sytë e të djeshmes, ka 1001 fjalë që mund të thuhen për të argumentuar se ç’bëhet. 4 të vrarët e 21 Janarit, 10 vjet pasi janë ndarë nga jeta nuk prehen të qetë. Ashtu sikundër të gjithë familjarët dhe të afërmit e tyre, sa herë që ajo plagë dhemb, nuk kanë sesi të marrin frymë të lehtësuar, të paktën nga fakti që duhet bërë drejtësi.
Nëse e shohim 21 janarin me sytë e së nesërmes, nëse bëjmë një vlerësim objektiv mes situatës së sotme dhe asaj të djeshme, të sistemit të drejtësisë, kemi të gjitha arsyet që të jemi besimplot dhe të inkurajuar që transformimi po funksionon. Natyrisht rruga e përmbushjes së këtij transformimi është ende për t’u ndërtuar. Jemi në mes të rrugës. Mes të djeshmes dhe të nesërmes.
