Deputetja e PD, Grida Duma ka deklaruar se do t’i bashkohet protestës së thirrur nga “Foltorja”, më 7 korrik. Tashmë e rreshtuar në krah të Berishës, ajo i ka bërë thirrje qytetarëve dhe deputetëve që t’i bashkohen protestës.
Duma ka shprehur edhe pakënaqësinë e saj ndaj Sali Berishës, pasi ky i fundit nuk e pyeti për protestën e 7 korrikut.
“Absolutisht po. Kanë bërë shumë mirë që i kanë përfshirë deputetët kudo. E mira është përveç përfshirjes të kërkonin dhe mendime më tej se sa përfshirja.
Duhet të kuptojmë qartë që grupi parlamentar duhet të ketë prestigjin e të respektohet si i votuar nga demokratët dhe nga shqiptarët.
Si të tillë nuk është vetëm çështje që të jemi në grupe pune, duhet patjetër të konsultohen të gjithë deputetët sa i takon strategjisë që do të ndiqet.
Unë jam pro protestave. Besoj që protesta do bashkojë demokratët pastaj se çfarë do bëjë hierarkia lart është çështje më e madhe se kaq”, u shpreh deputetja.
Kujtojmë që deputetja Duma nuk e ka njohur më parë ‘Foltoren’ e Sali Berishës, ku nuk kanë munguar as sulmet publike ndaj tij.
Ajo është shprehur se e njeh Berishën vetëm si liderin që krijoi partinë Demokratike.
Deputetja i ka bërë thirrje ish-kryeministri që duhet të zgjidhë në gjyq çështjen e non-gratës dhe PD duhet të lerë të lirë nga ndikimi i tij.
