Prokuroria e Durrësit ka marrë të pandehur biznesmenin Shaban Hersin në Durrës për pastrim parash. Kjo sepse sipas hetimeve të bëra që nga viti 2017, ai ka pastuar llogaritë e një shtetasi italian i cili dyshohet se ka lidhje me mafien.
Në dokumentin e bërë publik nga Prokuroria e Durrësit thuhet se në vitin 2017, biznesmeni Shaban Hersi ka bërë transaksione të dyshimta me llogarinë e tij bankare. Ndërkohë policia ka informuar se Hersi ka akuza edhe për trafik droge dhe mashtrim kompjuterik.
Për 6 ditë në gusht 2017 Shaban Hersit iu hodhën rreth 150 mijë euro nga një shoqëri italiane. Shaban Hersi ka deklaruar se të ardhurat 150 mijë € i ka nga qiraja e një vreshti dhe një ullishte.
Mes të tjerash Prokuroria e Durrësit vë në dukje se biznesmeni Shaban Hersi ka dhënë me qira 4 mijë m2 vresht dhe ullishte për 600 mijë € për 4 vite, ndërsa shtetasi italian që kishte marrë këtë ullishte rezulton i dënuar në Itali për afera fiskale. Po ashtu italiani akuzohet se ka lidhje me mafien italiane ndërsa ka deklaruar se nuk ka dijeni për kompaninë që ka paguar Shaban Hersin.
Sipas organit të akuzës durrsake, Hersi dyshohet se e ka kryer transferimin pjesë-pjesë të parave, produkt i veprës penale ose i veprimtarisë kriminale dhe posedimit apo fitimit të pronësisë mbi to.
Këtë veprim e ka kryer me qëllim fshehjen ose mbulimin e origjinës së paligjshme të parave, duke e paraqitur si të ishte pjese e shitjes së kolektorëve për energjinë diellore efikase për prodhimin e ujit të ngrohtë sanitar, me pas duke e paraqitur si shërbim konsulence dhe ne fund si pagese qiraje për një sipërfaqe toke.
Të përfshirë në këtë vepër penale janë dhe dy shtetas të tjerë një italian dhe një shqiptar.
Të dy janë persona të dyshuar për aktivitete kriminale në fushën e bashkëpunimit të jashtëm në shoqatë mafioze, krime në fushën e financave si dhe me tendencën e trafikimit të lëndëve narkotike, aktivitete këto te cilat gjenerojnë te ardhura te konsiderueshme kriminale. Këta shtetas dyshohet se te paktën kishin në dispozicion një shumë prej 600.000 euro, si të ardhura nga aktiviteti kriminal.
