Shkruar nga Pamfleti
Kreu i PDIU, Shpëtim Idrizi ka konfirmuar sërish se partia e tij do të dalë në zgjedhje e vetme dhe përjashtoi mundësinë e bashkëpunimit me partitë opozitare.
Ai shtoi gjithashtu se janë shumë arsye se përse partia e tij ka vendosur që të garojë e vetme në zgjedhjet e 14 majit, por kryesorja sipas tij është se parti që ai drejton ka mundësinë dhe peshën për të garuar e vetme.
“Besoj se është vonë të flasim për oferta sepse kemi rreth dy muaj që kemi marrë vendimin që do të dalim të vetëm në këto zgjedhje. Nuk ka qenë një çështje ofertash më, sepse do të ishte e vështirë që ne të rreshtohemi me një nga dy pjesën e PD, sepse që në krye të herës unë nuk jam prononcuar për problemin brenda PD… PDIU ka të gjitha mundësit dhe peshën specifike për ta provuar dhe për të garuar më vete. Vendimi i PDIU për të dalë vetëm në zgjedhje është vendimi më i drejtë.
Janë disa arsye pse vendosëm të dalim vetëm. Kur themi që do dalim vetëm, sigurisht as me PS. Është e vështirë të shohim ndonjë raport me PS. PDIU gjithmonë ka qenë parti e katërt dhe ka qenë shumë e qartë ku ka qenë pesha e saj specifike. Dalja më vete sigurisht që do na bëjë mirë. Ne kemi garuar në disa bashki dhe në të kaluarën dhe sigurisht që po matim disa nga arsyetimet që në disa nga bashkitë të nxjerrim kandidatë. Ne kemi dalë në 3-4 bashki, pak a shumë dihen. Në momentin që fronti opozitar nuk është i bashkuar, sigurisht që po shohim dhe mundësi dhe alternativa të tjera. Qytetarët kanë mundësi të shohin dhe oferta të tjera” u shpreh Idrizi.
