Parlamenti Evropian ka miratuar ditën e sotme rezolutën, e cila propozon ndryshime dramatike në qasjen e BE-së ndaj zgjerimit.
Rezoluta e përpiluar nga deputeti kroat, Tonino Piculla propozon heqjen dorë nga votimi me konsensus dhe marrja e vendimeve me shumicë të kualifikuar. Po ashtu, kërkohet që viti 2030 të jetë afat i fundit për përmbyllje të negociatave për anëtarësim dhe përmendet që procesi i zgjerimit nuk ka alternativë.
“Të forcohen kapacitetet e BE-së për të vepruar, duke reformuar procesin e vendimmarrjes, përfshirë këtu formatin me shumicë të kualifikuar në fushat relevante për procesin e zgjerimit”, thuhet në rezolutë.
Mes tjerash në rezolutë përmendet që kredibiliteti i procesit të zgjerimit, dhe i gjithë BE-së, është dëmtuar me raste, pasi disa vende anëtare kanë shfrytëzuar interesat e tyre nacionale për të bllokuar procesin e zgjerimit. Kjo gjë, sipas raportit, “ka krijuar hapësirë për shtrirjen e ndikimit të Rusisë, Kinës dhe faktorëve tjerë të dëmshëm në rajon”.
Sa i përket Ballkanit, në rezolutë përmendet që qasja e Parlamentit ndaj këtij rajoni duhet të ketë në fokus përshtatjen e vendeve ballkanike me qëndrimet e BE-së në fushën e politikës së jashtme dhe sigurisë. Në këtë drejtim vendosja e sanksioneve ndaj Rusisë, përmendet si kusht, për vazhdimin e negociatave të Serbisë për anëtarësim në bllokun evropian.
“Negociatat me Serbinë të vazhdojnë vetëm nëse ky vend përshtatet me sanksionet e BE-së ndaj Rusisë dhe bën reforma domethënëse të lidhura me BE-në”- thuhet në rezolutë.
Përveç sanksioneve, rezoluta kërkon kushtëzimin e ndihmave financiare për Serbinë. Në rezolutë përmendet edhe nevoja për përparim në dialogun mes Kosovës dhe Serbisë drejt një marrëveshjeje gjithëpërfshirëse, me qëllim që të dyja vendet në avancojnë në rrugën drejt BE-së. Sipas rezolutës, Parlamentit Evropian i kërkohet që të ndëshkohet përmbushja e kritereve të shpërblehet, derisa mungesë e përparimit nga vendet kandidate, të ndëshkohet.
Lexo edhe:
Parlamenti Europian miraton rezolutën, shpall Rusinë shtet terrorist
