Dy persona kanë përfunduar në prangat e Policisë lidhur me përplasjen me armë që tronditi mesditën e djeshme Elbasanin.
I arrestuar është shtetasi E.C., 21 vjeç, që dyshohet të ketë penguar zbardhjen e ngjarjes.
Ndërkaq po ashtu ka përfunduar në pranga shtetasi me inicialet F.F, i akuzuar për veprën “vrasje me dashje”.
Kujtojmë që dje në Spitalin e Traumës u arrestua Ervis Causholli, i cili mbeti i plagosur nga të shtënat me armë.
Ndërkaq, “blutë” po vijojnë punën për kapjen e autorit tjetër të dyshuar, shtetasit me inicialet M.Q. (Migert Qosja)
Njoftimi i Policisë
Në vijim të veprimeve për zbardhjen e ngjarjes së ndodhur mesditën e djeshme, në lagjen “Emin Matraxhiu”, Elbasan, ku gjatë një konflikti të çastit mes dy drejtues automjetesh u përdorën dhe armë zjarri, falë veprimeve të shpejta hetimore dhe profesionale u bë e mundur zbardhja e ngjarjes, vënia në pranga e njërit prej autorëve dhe shpallja në kërkim e një tjetër autori.
Si rezultat i veprimeve hetimore të thelluara, nën drejtimin e Prokurorisë së Rrethit Gjyqësor Elbasan, nga specialistët për Hetimin e Krimit kundër Personit në Drejtorinë Vendore të Policisë Elbasan u arrestuan në flagrancë shtetasit:
F. F., 21 vjeç, banues në Elbasan, për veprat penale “Vrasje me dashje” e mbetur në tentativë e kryer në bashkëpunim dhe “Armëmbajtja pa leje”.
E. C., 21 vjeç, banues në Librazhd, për veprat penale “Veprime që pengojnë zbulimin e së vërtetës” dhe “Moskallëzim krimi”.
Gjithashtu, si rezultat i këtyre hetimeve është shpallur në kërkim policor, për veprat penale “Vrasje me dashje” e mbetur në tentativë, e kryer në bashkëpunim dhe “Armëmbajtja pa leje” shtetasi A. C., 21 vjeç, banues në Elbasan. Vijon puna për kapjen e tij dhe për kapjen e autorit tjetër, shtetasi M. Q.
Materialet hetimore i kaluan Prokurorisë pranë Gjykatës së Shkallës Parë Elbasan, për veprime të mëtejshme procedurale.
