Përplasjet në Partinë Demokratike janë transferuar në Komisionin Qendror të Zgjedhjeve, ku po zhvillohet sot mbledhja e parë përgatitore për zgjedhjet e pjesshme vendore të 6 marsit.
Ivi Kaso, përfaqësues i PD në KQZ, por që është në mbështetje të Berishës, ka kundërshtuar përfaqësinë e PD-së në komision, pasi sipas tij ata janë të dërguar nga Lulzim Basha, i cili nuk është më kryetar për Komisionin e Rithemelimit.
“Besoj që momenti procedural kur do të duhet të verifikohet kjo gjë nga ana e KQZ ka për të qenë regjistrimi i subjekteve zgjedhore në garë”, tha Kaso.
Ndërkohë Komisioneri Shtetëror i Zgjedhjeve, Celibashi i është përgjigjur duke thënë se përfaqësues ligjorë të PD në KQZ janë Indrit Sefa dhe Marash Logu, duke e përjashtuar Kason.
“Në pikëpamje të ligjit raporti i një partie politike me KQZ-në është një raport i vazhdueshëm, edhe në atë jo zgjedhore. Me gjithë keqardhjen që kam në lidhje me këtë situatë, duhet të pranojmë që jemi në marrëdhënie institucionale. Ai që është përfaqësues ligjor i saj ka konsideruar se cilët do të jenë përfaqësuesit e saj në Komisionin Qendror të Zgjedhjeve. Opinionet dhe mendimet e PD-së në lidhje me aktet janë ato që do të prezantojnë nga Indrit Sefa dhe Marash Logu”, tha Celibashi.
