Pas skandalit #metoo Placido Domingo jep intervistën e tij të parë. Tenori 78 vjeçar i akuzuar për ngacmime seksuale nga 9 gra, hedh poshtë akuzat. Për saitin online “El Confidential” shpjegon: “Nuk kam paragjykuar as penguar karrierën e askujt. Nuk kam premtuar kurrë diçka në këmbim të favoreve. Ne spanjollët jemi të zjarrtë, të dashur. Kam qenë gjithnjë i sjellshëm dhe i njerëzishëm”.
Tenori rrëfen se nuk dilte më nga shtëpia: “U ndjeva i gjykuar keq dhe i dënuar, por pa bërë asnjë krim. Vazhdova të punoj, të studio, të krijoj. Ky është antidoti i makthit që po jetoj”.
“Ishte një rrufe, – shpjegoi Domingo edhe për ‘Corriere della sera’ – pas artikullit të parë ku më akuzuan rëndë për ngacmime seksuale dhe abuzim me pushtetin, lajmi u përhap në të gjithë botën. U thanë gjëra shumë ofenduese për mua si qenie njerëzore. Në pak orë, pa patur nevojë për përgjigje, u anuluan impenjimet e mia. Në pak ditë, gjysmë shekulli karrierë u hodh tutje me një lëvizje gishti”.
