Rama nis lëvizjet e para për të shfuqizuar ligjin e dekriminalizimit që u miratua 6 vjet më parë me urdhër të SHBA-BE për të çliruar shtetin nga bosët e krimit pranë Bablokut, rrëzimi i ligjit kërkohet nga njerëzit e drogës dhe prostitucionit,
Në një kohë kur Shtetet e Bashkuara të Amerikës dhe Bashkimi Evropian po i kërkojnë në mënyrë ultimative që të heqë dorë nga plani për të futur njerëzit e drogës, prostitucionit, korrupsionit dhe vrasësit në listat e kandidatëve për deputetë, si dhe të mos flirtojë me Rusinë dhe Kinën, Edi Rama ka nisur lëvizjet e para për të shfuqizuar ligjin e dekriminalizimit, i miratuar 6 vite më parë, në presionin e fortë dhe kamxhikun e SHBA-BE, për të çliruar shtetin nga krimi.
Ditët e fundit Rama i ka shprehur rrethit të tij të ngushtë politik idenë se ligji për dekriminalizimin duhet të shfuqizohet, pasi një ligj i tillë nuk mund të zbatohet për një kohë kaq të gjatë, duke dëmtuar imazhin e Shqipërisë, si vendi unikal në botë me një ligj të tillë që ndalon me dispozitë futjen e krimit në Parlament, në krye të bashkive, drejtorive dhe në çdo zyrë shteti.
Sipas Ramës depërtimi i kriminelëve në krye të shtetit është më shumë një sajesë e opozitës dhe një kauzë boshe e saj, se sa një realitet.
Nga burime të sigurta, mësohet se Rama u ka kërkuar juristëve të besuar që të gjejnë edhe argumente të tjera si dhe një formë për të arritur këtë synim, pra shfuqizimin e këtij ligji.
Sipas tij, zbatimi i këtij ligji për 5 vite është i mjaftueshëm. Deri më tani plani është mbajtur i fshehtë, po ditët e fundit, për herë të parë, ideja e rrëzimit të ligjit të dekriminalizimit ka nisur të deklarohet publikisht. Fillimisht ka nisur të diskutohet brenda rrethit të Edi Ramës dhe së fundmi në publik.
Deputeti i PS Arben Pëllumbi ka deklaruar një ditë më parë se “Kemi ligjin e dekriminalizimit, një ligj që për hir të së vërtetës duhet të jetë i përkohshëm sepse vetë termi dekriminalizim nuk e nderon politikën”. Pas Pëllumbit, me këtë ide, pritet të dalin edhe Ulsi Manja, Vasilika Hysi, Alket Hyseni etj., pra rrethi i juristëve të Ramës, me të cilët miraton ligje anti-demorratike, siç ishte edhe ligji për rikthimin e censurës dhe mbylljes së mediave kritike, që u rrëzua si anti-demokratik nga Komisioni i Venecias.
Disa muaj pas miratimit të ligjit në vitin 2015, Edi Rama do të shprehje se “Ligji i “dekriminalizimit” unikal në botë për nga ashpërsia, tani pyesni Shqupin, ku janë 19 kriminelët e PS në kuvend?”.
Në një tjetër reagim, në vitn 2016, Rama u shpreh se “19 kriminelët e paralajmëruar nga PD-ja nuk janë zbuluar, asnjë deputet i PS nuk rezulton të jetë subjekt i ligjit të dekriminalizimit. Është ligji ai që vendos se kush janë ata që nuk e meritojnë të qëndrojnë aty dhe kush mund të qëndrojë dhe fakti që asnjë deputet dhe i zgjedhur i PS nuk cënohet nga ky ligj tregon që kemi qenë të hapur, të vërtetë. Rezulton se ata janë në një telash shumë të mëdh, sepse ju kanë dalë nga ferrat personazhe që deri dje PD mbase nuk i dinte, apo nuk i konsideronte brenda grupit të vet parlamentar”.
Kur njerëzit e krimit në Parlament dhe në krye të bashkive nisën të dilnin një nga një, Edi Rama e ndryshoi alibinë, duke thënë se nuk dinte gjë për të kaluarën e tyre dhe se përgjegjësia ishte e atyre. Në fillim ‘rrihte gjoksin’ se përfaqësuesit e tij ishte të pastër, kur doli e kaluara e tyre si vrasës, tutorë prostitutash, përdhunues, trafikantë dhe hajdutë vilash, ua kaloi përgjegjësinë atyre.
Megjithatë, realizimi i planit të shfuqizimit ligjit të dekriminalizimit është i vështirë, jo për shkak të opozitës, se Edi Rama nuk pyet për të, por falë rolit të Shteteve të Bashkuara të Amerikës dhe Bashkimit Evropian, të cilët nuk do ta lejojnë një gjë të tillë.
Nëse Edi Rama do të urdhërojë ushtarët e tij që ta hapin debatin për shfuqizimin e ligjit të deklariminaliimi, pritet një kundërpërgjigje e fortë nga përfaqësuesit e SHBA-BE në Tiranë./Pamfleti
