Ish-përfaqësuesi i lartë në Bosnje e Hercegovinë, Valentin Inzko ka deklaruar se ‘non paper’, dokumenti jozyrtar diplomatik që qarkulloi në Bruksel, për ndryshim të kufijve në Ballkanin Perëndimor sipas linjave, etnike ekziston ende.
Inzko, i cili nuk është paraqitur në media që pas largimit nga posti i Përfaqësuesit së Lartë në Bosnje dhe Hercegovinë, ka dhënë një intervistë për mediat sllovene se ky ‘non-paper’ është në sirtarin e tij që gati katër vjet.
“Non-paper-i i famshëm për ndryshimin e kufijve në Ballkan, të cilin disa e inkurajuan në Slloveni, është në sirtarin tim për gati katër vjet”, tha Inzko në një intervistë të tij për mediat sllovene.
Një pjesë e intervistës në të cilën Inzko bën këto pretendime është publikuar në profilin e tij në Twitter nga kryeministri slloven Janez Jansa, i cili u spekulua si autor ose bashkëautor i këtij dokumenti. Kujtojmë se në prill të vitit të kaluar dokumenti u publikua fillimisht nga media sllovene, nën autorësinë e pretenduar të kryeministrit slloven Janez Jansa e në adresë të presidentit të Këshillit Europian Charles Michell, si një propozim mbi trajtimin e problematikave në rajon pasi Sllovenia të marrë Presidencën e BE-së në korrik.
Duke qenë se ishte një dokument diplomatik jozyrtar që synonte të komunikonte pikëpamje dhe iniciativa të ndryshme pa karakter zyrtar, ai nuk kishte as nënshkrim.
Ekzistenca e këtij dokumenti është mohuar nga kryeministri slloven dhe anëtarët e Këshillit Evropian dhe i gjithë rasti, duke gjykuar nga deklaratat e fundit të ish-përfaqësueses së lartë, ende nuk ka marrë epilog.
Çfarë parashikonte plani?
Mediat sllovene publikuan një dokument “non-paper”, që u tha se kryeministri slloven, Janez Jansha, i ka dërguar Këshillit Evropian. Në këtë dokument flitej lidhur me propozimin e supozuar të Janshës për ricaktimin e kufijve në Ballkanin Perëndimor, si një mënyrë për të zgjidhur problemin kronik ndërmjet gjashtë vendeve në rajon. Sipas përmbajtjes që u publikua në media, bëhet fjalë për ricaktimin e kufirit të Kosovës dhe Serbisë, si dhe parashikohet mundësia e shkëputjes së entitetit të Republikës Serbe nga Bosnje e Hercegovina, bashkimi i pjesëve me shumicë shqiptare të Malit të Zi dhe Maqedonisë së Veriut me Shqipërinë, si dhe bashkimi i një pjese të Bosnje e Hercegovinës, pra, Hercegovinës perëndimore me Kroacinë.
