Kronike30 Nëntor 2022, 16:32

"Plumbi i artë"/ I shpallur në kërkim pas dëshmisë së Nuredin Dumanit, arrestohet në Holandë Bledar Debrova

Shkruar nga Pamfleti
"Plumbi i artë"/ I shpallur në kërkim pas

Foto Ilustruese

Eljo (Ervis) Bitri alias Bledar Debrova, i shpallur në kërkim ndërkombëtar në kuadër të operacionit ‘Golden Bullet’, është arrestuar nga autoritetet holandeze pasi qarkullonte me pistoletë me silenciator me vete dhe një dokument fals identifikimi.

Nga të dhënat paraprake bëhet me dije se 35-vjeçari është arrestuar në Leiden të Holandës, pasi u kap në shkelje gjatë disa kontrolleve rutionore, sidoqoftë nga verifikimet nëpërmjet Interpol Tirana dhe Interpol Hagë, u zbulua identiteti i tij i vërtet si person nën hetim për vrasje me pagesë. Në përfundim të krahasimit të gjurmëve të gishtave, autoritetet holandeze kanë bërë arrestimi provizor të Debrovës, me qëllim ekstradimi.

“Falë bashkëpunimit dhe shkëmbimit të informacionit në kohë reale, finalizohet një tjetër operacion ndërkombëtar për kapjen e personave me rrezikshmëri të lartë shoqërore, që janë në kërkim ndërkombëtar.

Finalizohet në Holandë, operacioni policor i koduar “Leiden”, i zhvilluar nga Policia holandeze, në bashkëpunim me Policinë e Shtetit. Qarkullonte me armë zjarri me silenciator dhe përdorte dokument me identitet tjetër, kapet dhe vihet në pranga 35-vjeçari nga Elbasani.

35-vjeçari ishte shpallur në kërkim ndërkombëtar, në kuadër të operacionit “Golden bullet”, pasi Gjykata e Posaçme e Shkallës së Parë Për Korrupsionin dhe Krimin e Organizuar i ka caktuar masën e sigurisë “Arrest në burg”.

Në vijim të punës hetimore të kryer nga strukturat hetimore të Policisë së Shtetit, për lokalizimin dhe kapjen e personave me rrezikshmëri të lartë shoqërore, që janë të shpallur në kërkim ndërkombëtar, falë shkëmbimit të informacionit në kohë reale, me homologët holandezë, në kuadër të operacionit “Leiden”, u kap nga Policia holandeze shtetasi:

Eljo (Ervis) Bitri alias Bledar Debrova, 35 vjeç, lindur dhe banues në Elbasan, i shpallur në kërkim ndërkombëtar, në kuadër të operacionit “Golden bullet”. Ky shtetas u kap në Leiden, Holandë, duke qarkulluar me armë zjarri pistoletë me silenciator dhe me dokument me identitet tjetër.

Pas veprimeve verifikuese nëpërmjet Interpol Tirana dhe Interpol Hagë, Holandë, pas krahasimit të gjurmëve të gishtave, u bë arrestimi provizor i tij, me qëllim ekstradimi.

Gjithashtu, shtetasi Eljo (Ervis) Bitri alias Bledar Debrova, 35 vjeç, ishte shpallur në kërkim ndërkombëtar edhe nga Belgjika, pasi Gjykata e Shkallës së Parë në Bruksel, Belgjikë, më datë 31.05.2022, ka lëshuar ndaj këtij shtetasi urdhër arrestin për kryerjen e veprës penale “Vrasja me paramendim”, parashikuar nga Kodi Penal i Belgjikës (maksimumi i dënimit burgim i përjetshëm).

Policia e Shtetit është e vendosur për të bashkëpunuar ngushtësisht me partnerët, me qëllim kapjen e personave me rrezikshmëri të lartë shoqërore dhe për të luftuar krimin e organizuar.

Policia e Shtetit falënderon homologët holandezë, për bashkëpunimin e shkëlqyer dhe shkëmbimin e informacioneve në kohë reale, për kapjen e personave në kërkim ndërkombëtar”– thuhet në njoftimin e policisë.

Kronike Bledar Debrova Nuredin Dumani