SHBA, e cila është aleatja më e rëndësishme e Shqipërisë dhe vendi më i fuqishëm në botë, po nxit autoritetet shqiptare që të çojnë përpara drejtësisë Sali Berishën.
Tashmë është e qartë për të gjithë se qeveria e Shteteve të Bashkuara të Amerikës ka dërguar në Tiranë, të gjitha provat që ka ajo në lidhje me Sali Berishën, i cili u shpall ‘Non Grata’ për korrupsion të nivelit të lartë.
Aq e vërtetë është kjo, sa numri 3 i DASH dhe i dërguari për Ballkanin i Presidentit Amerikan, Gabriel Escobar, ka deklaruar dy herë që i kanë çuar provat për Sali Berishën tek autoritetet shqiptare dhe ka përsëritur kërkesat që të hetohet për këto çështje.
Në intervistën e djeshme për ‘VOA’ e tha sërish, duke shtuar përveç korrupsionit, edhe akuzën për dhunën e 8 janarit.
Pra SHBA, e cila është aleatja më e rëndësishme e Shqipërisë dhe vendi më i fuqishëm në botë, po nxit autoritetet shqiptare që të çojnë përpara drejtësisë Sali Berishën.
Deklaratat e Escobar ishin mjaft të qarta. Dje Sali Berisha dhe Flamur Noka, u thirrën në Prokurorinë e Tiranës në lidhje me dhunën e 8 janarit. Deklaratat e dhëna pas takimit me krerët e Prokurorisë, tregonin qartë frikën dhe panikun e dy drejtuesve që sipas gjasave janë kapur mat.
Siç mësohet nga burime pranë organeve ligjzbatuese, shërbimet perëndimore kanë furnizuar policinë shqiptare me filmime ekselente mbi dhunën e 8 janarit, të patransmetuara në televizionet shqiptare, edhe pse ngjarja u dha live.
E policia, të gjitha këto filmime i ka depozituar në Prokurorinë e Tiranës…
Sipas burimeve, po tentohet që të kërkohet inkriminimi i Flamur Nokës si drejtues i operacionit, e jo i Sali Berishës, të cilin e kanë parë të gjithë që ka frymëzuar, organizuar dhe financiar gjithçka.
Siç mësohet, për Nokën, Prokurorët kanë një material më të pasur dhe janë më afër përpilimin e letrave për të kërkuar nga Parlamenti lejen për arrest.
Ndërkohë, edhe pse Sali Berisha është nën hetim, për 8 janarin, ka një hezitim për ta marrë të pandehur.
Po kush e pengon një gjë të tillë, nëse gjërat janë të qarta. Përse janë arrestuar dhe u mbajtën disa ditë në flagrancë disa djem të rinj, që në fund të fundit, ata kishin shefa që i kishin çuar deri aty, ndërkohë që këta të fundit, përveçse janë të lirë, bëjnë moral edhe para kangjellave të Prokurorisë së Përgjithshme.
Duket se në këtë atmosferë ka një frenim që prokuroria është ndikuar nga Edi Rama dhe mazhoranca. E mbani mend situatën e vitit 2017 kur Lulzim Basha i kërkoi Adriatik Llallës publikisht që të arrestojë Saimir Tahirin? Llalla me njerëzit e tij, i bënë letrat shpejt e shpejt sapo tha Basha.
Po në këtë rast, përse Edi Rama nuk e ka dënuar dhunën publikisht siç ka bërë SHBA në nivelin më të lartë të qeverisjes?
Përse policia e shtetit nuk dërgon një denoncim për organizatorin e dhunës, pasi asaj i takon të plotësojë dosjen që dërgoi në Prokurori. Ndërsa i ka proceduar të gjithë madje edhe Flamur Nokën, mësohet se policia e Shtetit ka amnistuar Sali Berishën. Nëse është e vërtetë, ky është urdhër politik…/Pamfleti
