Vdekja e George Floyd, 47-vjeçarit afrikano-amerikan që humbi jetën gjatë një arrestimi policor në Minneapolis, Minesota, ka sjellë protesta të dhunshme në Amerikë, aq sa presidenti Donald Trump po mendon që të hyjë me ushtri për të neutralizuar turmat.
Demonstruesit kanë shpërthyer një seli policie në Minneapolis, duke vendosur zjarr dhe duke shkatërruar gjithçka që iu del përpara. Nëse në fillim ka pasur një prani të madhe të punonjësve të policisë, me kalimin e orëve ata janë tërhequr, duke mos bërë rezistencë ndaj prishjes, dhe për të shmangur përplasje që mund të çojnë në humbje jete.
Një korrespodente e RT e cila ka qenë në vendin e ngjarjes shprehet se në shumë ndërtesa janë aktivizuar alarmet e zjarrit, ndërkohë që protestuesit vijojnë që të qendrojnë në rrugë, dhe jashtë godinave të institucioneve.
Fire everywhere pic.twitter.com/rKVGXHLjAR
— Sophia Narwitz (@SophNar0747) May 29, 2020
Katër oficerët e policisë që janë përfshirë në vrasjen e George Floyd të hënën raportohet se kanë punuar në zonën e 3-të, ku protestat u përshkallëzuan së pari në fillim të kësaj jave, duke zbritur në trazira të mërkurën në mbrëmje.
Presidenti amerikan Donald Trump ka premtuar veprime vendimtare për të shuar trazirat në Minneapolis, duke kërcënuar se do të përfshijë ushtrinë nëse kryetari i qytetit nuk do ta bëjë punën “si duhet”.
Ultimatumi erdhi herët në mëngjes të premten në një postim të presidentit në Twitter, duke e quajtur kryetarin e Minneapolis Jacob Frey si “shumë të dobët”, ndërsa paralajmëroi se qeveria federale do të marrë përsipër situatën nëse autoritetet lokale nuk e vendosin atë nën kontroll.
“Nuk mund të qëndroj prapa dhe të shikoj që kjo të ndodhë në një qytet të madh amerikan, Minneapolis. Një mungesë e plotë e udhëheqjes”, tha Trump në postimin e tij. “Ose kryetari shumë i dobët i të majtës Radikale, Jacob Frey, të marrë nën kontroll qytetin, ose unë do të dërgoj Ushtrinë Kombëtare dhe do ta bëj punën e duhur”, tha më tej Trump.
Kryetari i Komunës së Minneapolis, demokrati Jacob Frey, menjëherë dënoi incidentin duke kërkuar që agjentët e përfshirë të akuzohen dhe të gjykohen.
