Dështon marrëveshja mes opozitës dhe mazhorancës për zgjedhjen e Presidentit të ri.
Mësohet se, Partia Demokratike ka anuluar mbledhjen e grupit parlamentar të thirrur pasditen e sotme, ku Enkelejd Alibeaj kishte ftuar të gjithë anëtarët e grupit, përfshirë edhe ata të Rithemelimit – me përjashtim të Sali Berishës – për të diskutuar mbi emrat në fjalë.
Lajmi është bërë i ditur nga deputeti demokrat, njëkohësisht sekretari i Grupit Parlamentar, Arbi Agalliu.
Shkak për anulimin e kësaj mbledhjeje është bërë sjellja joracionale e mazhorancës. Megjithëse premtuan një president konsensual, duke iu dhënë mundësinë demokratëve të paraqesin kandidatët për dy raundet që pasojnë dhe shtrënguar duart në një marrëveshje, Taulant Balla ka thyer paktin e 18 majit. Përmes një deklarate për mediet, kreut të Grupit Parlamentar socialist Taulant Balla theksoi se nuk presidenti nuk zgjidhet në raundin e dytë e të tretë, por do të zgjidhet nga Partia Socialiste në raundin e katërt. Çka zbulon se e gjitha ishte një farsë dhe se socialistët as që nuk e kishin çuar në mendje t’iu jepnin mundësinë demokratëve të negocionin me rregulla të barabarta në tryezën e diskutimeve për zgjedhjen e Kreut të ri të Shtetit.
“Dy ditë më parë kemi rënë dakord që në raundin e dytë dhe të tretë ne nuk do propozojmë kandidat dhe i takon opozitës të propozojë. Propozimi për President duhet të vije dhe me firma mbështetëse nga opozita. Nëse presidenti nuk zgjidhet në këto dy raunde, ne raundin e katërt do të propozojmë ne. Takimi ka qenë publik dhe kjo është dakordësuar ne prani të mediave”, ka thënë Balla.
Ky sqarim i Ballës, që tregon një mungesë vullneti dhe serioziteti të mazhorancës për një proces të një rëndësie madhore sikurse është zgjedhja e Presidentit, është cilësuar si shkelje e marrëveshjes nga kryetari i Grupit Parlamentar të PD-së, Enkelejd Alibeaj.
Por, çfarë thotë drafti i Enkelejd Alibeajt?
Në draftin e hedhur në tryezën e përbashkët me maxhorancën, Enkelejd Alibeaj propozon një formulë për dakordësinë mes palëve. Sipas saj, opozita parlamentare propozon katër kandidatë dhe më pas maxhoranca përzgjedh dy emrat që gëzojnë besimin më të madh.
Pas kësaj, një komision i përbërë nga 6 anëtarë, 3 nga PS dhe 3 nga PD, shqyrtojnë 2 kandidatët e përzgjedhur dhe bien dakord për përzgjedhjen dhe propozimin e përbashkët të njërit prej kandidatëve. Kandidatura e përzgjedhur i nënshtrohet votimit në seancë plenare.
