Sot më 29 Maj përfundon afati që ka opozita në dispozicion për t’i propozuar mazhorancës një ose disa kandidatë për presidentin e Republikës.
Raundi i tretë për zgjedhjen e pasuesit të Ilir Metës, do të mbahet të hënën më 30 maj në orën 10:00, teksa negociatat mes palëve nuk kanë prodhuar konsensus.
Edhe në këtë raund do të duhen të paktën 84 vota për të zgjedhur kreun e ri të shtetit.
Kreu i Grupit të PD-së, Enkelejd Alibeaj akuzon mazhorancën se kanë prishur marrëveshjen, referuar këtu draftit të tij ku në një nga pikat parashikonte që emri i ri i presidentit të shkonte në Kuvend me firmat e përbashkët të demokratëve dhe socialistëve.
“Teksa Rama pa se s’kishte asnjë shans për t’i kapur apo joshur kandidatët ka bërë këtë gjë sot. Sepse ishin figura anti komuniste.Hapi i parë ne 4 propozime, hapa i dytë ata zgjedhin 2. Hapin e tretë e bëjmë bashkë zgjedhim kandidaturat. Hapa i katërt kërkon nënshkrimet e përbashkëta, si nevojë që procesi të finalizohej në mënyrë konsensuale”, ka deklaruar Alibeaj.
Ndërsa, kreu i grupit socialist, Taulant Balla tha se nuk kanë pranuar një pikë të tillë dhe se një opozita nuk do i hiqte kurrë të drejtën mazhorancës që të propozonin një emër.
Balla ka përsëritur se deri nesër në orën 16:00 kur do të jetë raundi i tretë i negociatave për Presidentin e ri, Partia Socialiste nuk do të propozojë asnjë emër duke i lënë radhën Partisë Demokratike.
“Nuk e dija që opozita paska kërkuar ta kenë ata Presidentin ose të paktën ta kenë shprehur kaq qartazi. Unë mendoj që Presidentin nuk duhet ta ketë asnjë parti në Shqipëri. Shqipëria meriton një President Republike që të jetë mbi palët. Unë mendoj që të gjitha palët duhet ta shohin me përgjegjësi këtë proces. Të vazhdosh të fshihesh pas një copë letre, është rrëzuar ai propozim në tërësi. Ne nuk do të propozojmë emër deri të dielën në orën 16:00 me shpresën që PD do ta ushtrojë këtë të drejtë. Historia e propozimeve në ajër nuk ka pasur dhe nuk ka asnjë efekt. Ne nuk kemi marrë asnjë propozim shkresor nga ana e PD. Ditët e mbetura të përdoren me përgjegjësi”, u shpreh Taulant Balla.
Ndërkohë me Sali Berishën, mazhoranca e ka bërë të qartë se nuk do të ulet në tryeze dhe nuk do të pranojë asnjë kandidat që propozohet nga “Rithemelimi”.
Tashmë mbetet për t’u parë nëse opozita do të propozojë kandidatë në këtë raund të radhës, apo Presidenti do të zgjidhet nga mazhoranca në dy raundet e mbetura.
Procedura si zgjidhet presidenti i ri
Sipas Kushtetutës procesi i zgjedhjes së Presidentit të Republikës në Kuvend nis jo më vonë se 60 ditë para mbarimit të mandatit të Presidentit aktual.
Domethënë në rastin konkret maksimumi duhet të ishte data 24 maj, pasi mandati i Metës mbaron më 24 korrik.
Tashmë është koha e propozimit zyrtar të kandidaturave, një grup me jo më pak se 20 deputetë ka të drejtën t’i propozojë Kuvendit kandidaturën për President të Republikës së Shqipërisë. Një deputet nuk mund të propozojë më shumë se 1 kandidat për Presidenti.
Kushtetuta përcakton se janë pesë raunde për zgjidhjen e Presidentit. Në tre raundet e para kërkohet një shumicë prej 3/5, 84 vota, ndërsa në dy e tjera, të katërtin dhe të pestin, presidenti mund të zgjidhet me 71 vota.
Raundet nga njëri tjetri duhet të zhvillohet brenda 7 ditëve, që do të thotë se Presidenti i ri i Republikës maksimalisht në gjysmën e dytë të muajit qershor do të jetë i zgjedhur, duke qenë se data e fillimit të procesit është konsideruar data 10 maj. Votimi për secilin raund bëhet i fshehtë dhe pa debate.
