Kreu i Grupit Parlamentar të Partisë Demokratike, Enkelejd Alibeaj është kundër protestës së 7 Korrikut të thirrur nga ish kryeministri Sali Berisha.
Jashtë dyerve të Kuvendit para nisjes së seancës plenare, Alibeaj tha se protesta duhet të nisë duke dalë kundër oligarkëve në Kuvend për çmimet e larta.
Sipas Alibeajt, nuk mund të jetë Sali Berisha shpresa e njerëzve të cilët sot vuajnë gjithmonë e më tepër.
“Do protestosh për krimin, duhet të flasësh këtu. Do protestosh kundër çmimeve të larta, kundër oligarkëve, unë besoj se mënyra më e mirë për të protestuar është këtu. Unë protestoj sot, protestoj në çdo rast. Detyra e çdo deputeti është kjo. Nuk mund të jetë Sali Berisha përfaqësimi i atyre njerëzve të cilët sot vuajnë gjithmonë e më tepër. Absolutisht jo. Më kuptuat mirë se çfarë thashë.
Nuk është ai shpresa e njerëzve. Para se të shkojnë te sheshi dhe t’u thonë njerëzve hajdeni të protestoni të vijnë këtu dhe të thonë një gjë. Kanë guxim ta thonë? Për të protestuar për çmimet e larta duhet të thotë se çfarë qëndrimi ka ndaj oligarkëve”, tha Alibeaj.
