Politike17 Gusht 2022, 18:30

PS gati ligjin për të "hequr qafe" Sali Berishën dhe spiunët e politikës

Shkruar nga Pamfleti
PS gati ligjin për të "hequr qafe" Sali Berishën dhe

Foto Ilustruese

Në sytë e publikut duket se shumica socialiste është me pushime vere për t’u bërë gati për një shtator të nxehtë. Por jo të gjithë socialistët këtë gusht janë 100%  me pushime larg Tiranë.

“Top Channel” mëson se deputetët socialist të komisionit parlamentar të ligjeve të mbështetur nga një grup juristësh brenda PS, kanë zhvilluar gjatë këtyre dy javëve të para të gushtit disa mbledhje konsultative. Qëllimi konsultimeve lidhet me amendimin e ligjit aktual të dekriminalizimit, i cili synon përfshirjen e një neni me qëllim despiunizimin e parlamentit.

Synimi është ndalimi nga kandidimi të gjithë atyre që kanë dosje si bashkëpunëtor të ish sigurimit të shtetit.

Nëse socialistët nuk do të tërhiqen rrugës nga kjo nisëm e do ta miratojnë ndryshimin, atëherë i pari person që preket është ish presidenti Ilir Meta tashmë Kryetar i Partisë së Lirisë. Gjithmonë nëse gjetjet e Autoritetit të Dosjeve, faktojnë se personi I.M që përmendet në dosje e Ligor Talos është Ilir Meta. Këto gjetje të autoritetit të dosjeve dërguara Kuvendin disa javë më parë, kundërshtohen me forcë nga zoti Meta.

Amendimi mëson “Top Channel” do të ketë edhe një shtesë tjetër.

Bëhet fjalë për sanksionim në ligjin e dekriminalizimit edhe një neni të posaçëm për dekomunistizimin, ku pengohet kandidimi ish-sekretarëve të Partisë së Punës. Nëse amendimi do të votohet në parlament, atëherë në karriget e parlamentit pas zgjedhjeve të ardhshme të 2025, Sali Berisha mbetet jashtë kuvendit të Shqipërisë.

Për të përjashtuar Berishën si ish-sekretar partie, PS ka si pengesë një vendim të gjykatës kushtetuese të 23 Marsit 2010, i cili rrëzoi ligjin e atëhershëm të lustracionit miratuar 22 Dhjetor 2008. Por socialistët thonë se për aq kohë sa parlamenti amendon ligjin e dekriminalizimi, dhe bën ndryshimet e duhura në Kushtetutë nuk ka asnjë pengesë në zbatim.

Këto dy shtesa në ligj, de-spiunizimi dhe dekomunistizimi shihen si të mjaftueshme prej socialistëve, duke mos patur nevojë vendosjen e ndalimit edhe të personave shpallur NonGrata nga SHBA, Britania e Madhe dhe BE. Palët e dëmtuara nga këto ndryshime, dyshja Berisha-Meta, nuk do të kursen në çuarjen e këtyre ndryshimeve në Gjykatën Kushtetuese, pasi ndryshe nga ligji i dekriminalizimit i miratuar me konsensusin e të gjitha palëve, do të jenë të njëanshme me autorë PS e mbështetur edhe me votat e fraksionit Alibeaj për të bërë numrin magjik 84 për çimentimin në Kushtetutë.

Politike #dekriminalizim Berisha Meta PS spiunët e politikës