Enver Hoxhaj thuajse çdo ditë në selinë e partisë së tij po shpall “anëtarësime të reja” që sipas gjasave do të jenë edhe kandidatë të PDK-së në zgjedhjet e 14 shkurtit.
Por realisht asnjë nga këto ardhje të “bujshme” nuk se kanë ngjitur në publik, nuk kanë dhënë atë lajmin e risisë, që të krijojnë një debat apo zhvillim për ta konsideruar si një lëvizje të rëndësishme.
Në fakt nuk se është hera e parë.
Edhe në zgjedhjet e shkuara, pra të 6 tetorit, Kadri Veseli shpalli Arbana Xharrën, Migjen Kelmendin apo edhe emra të tjerë si prurje në PDK, po këto nuk është se krijuan ndonjë elektorat të ri për partinë e Hashim Thaçit.
Po përse ndodh kështu?
Sepse PDK, nuk është një parti që mund të marrë vota se thirri në podium pedagogë që edhe në të shkuarën e kanë ditur që bëjnë lojën e kësaj partie, por që në elektorat asnjëherë nuk kanë tërheqë mbështetje.
Lëvizja më e rëndësishme e PDK-së është që një dizident i dorës së parë kundër regjimit serb si Haki Morina, është propozuar si kandidat për deputet. Por Morinën Enver Hoxhaj nuk e ka thirrë në podium.
Haki Morina është një aktivist i hershëm i çështjes shqiptare, i burgosur e i dhunuar nga regjimi serb. Pjesëtar i një familje të madhe e të nderuar të Klinës, njeri me kulturë të gjerë, poet, gazetar, por edhe politikan aktiv në Tiranë e Prishtinë, që PDK e degdisi në emigracion.
Sot Hakiu është thirrë për të kandiduar për PDK-në, gjë që ai e bën natyrshëm pasi është një nga themeluesit e partisë, që u largua sepse kundërshtoi partinë-shtet të Hashimit e Kadriut.
Të tjerët janë emra, qoftë edhe të rëndësishëm, por që nuk çojnë kandar në elektorat.
PDK është parti që merr vota tek ajo bazë që ka përkrahur luftën, por që sot është e zhgënjyer nga PDK, edhe pse si parti ka kontributet e veta, zhgënjimi mbetet.
PDK humbi zgjedhjet e 6 tetorit 2019, por që atëherë kjo forcë politike nuk ka bërë në asnjë rast mea coulpa-t e saj për abuzimin me pushtetin.
Viktimizimi me Thaçin e Veselin, nuk mbulon dot pikëpyetjet dhe zhgënjimet e njerëzve me punën e PDK-së.
Edhe pse Kadri Veseli mbajti një qëndrim të drejtë për të dalë në opozitë, ai mori pjesë në largimin e qeverisë së Albin Kurtit, duke u përfshirë në lojën e klikës së vjetër. Ndoshta krerët e PDK-së e quajnë një lëvizje normale të një partie opozitare, por realisht nuk ishte kështu.
Dhe sipas gjasave, PDK mund të humbë pikë pikërisht nga ai veprim, por kjo duhet parë më 14 shkurt.
Megjithatë, fytyrën partisë, nuk ia jep garniture, por thelbi i udhëheqjes, e si e tillë PDK vijon të mbrojë pa asnjë objeksion aktet e Hashim Thaçit e Kadri Veselit, të cilët votuan edhe Gjykatën Speciale ku ranë vetë Brenda, përkrahën aksionin e Grenell, nuk e kundërshtuan qeverinë e Avullah Hotit dhe përkrahën negociatat e Uashingtonit.
Pra në një farë mënyre, PDK nuk është se ka qenë realisht një parti opozitare, por një parti që i ka shërbyer synimit të Thaçit kur ishte President.
Natyrisht që pas largimit të Hashimit e Kadrisë, PDK është kthyer më shumë në një forcë melankolike, ku mërzija e përzija për fatin e udhëheqjes kërkohet të mbulohet me ardhmërinë e anëtarësimeve të reja.
Këto anëtarësime, do ta tregojë koha sa realisht do të shërbejnë për ta riformësuar PDK-në, por realisht kjo parti ka ende një hesap të pambyllur në radhë të parë me zgjedhësit e vet, e më pas me të gjithë qytetarët e Kosovës.
E kjo klimë ndjehet që në Drenicë, ku Sami Lushtaku ka hyrë në luftë me familjen Jashari për të riardhur në krye të komunës, e deri në zhvillimet e tjera në shoqëri.
Profesorët e gazetarët që Enver Hoxhaj i thërret në tribunën e konferencave për shtyp nuk mund të zëvendësojnë ndjesën që PDK duhet ta bëjë ndaj qytetarëve, nuk mund të zhbëjë atë që është bërë gjatë qeverisjes së Thaçit e Veselit.
PDK e ka pasur pushtetin që nga viti 2008, dhe njerëzit kanë votuar kundër pushtetit të saj.
Që të vijë ajo kohë kur PDK të rikthehet në drejtim, duhet që e pakta shoku Enver të mos dalë në podiumin e partisë ditë për ditë. Se, të gjithë të ardhurit në fund janë konsideruar si pjesë e udhëheqjes së Enverit. Po qytetarët e Kosovës një vit më parë votuan masivisht kundër Enverit…/Pamfleti
