Debati mes kryekamarierit Gazment Kurmaku dhe klientit 33 vjeçar Erjon Llapshi, para se ky i fundit ta qëllonte me grusht në kokë duke e lënë në vdekje klinike, ka ndodhur në 1 minutë e 11 sekonda.
Në videon e siguruar nga ABC, shfaqen dy persona të ulur në një tavolinë prej 4 personash. Përballë kameras është Erjon Llapushi, i cili shoqërohet nga shoku i tij. Sapo ulen, të dyve u shkon pranë tavolinës kryekamarieri, Gazment Kurmaku dhe u kërkon që të lëvizin duke u shpjeguar se ishte e rezervuar.
Por kjo gjë duket se nuk i ka pëlqyer 33 vjeçarit. Pas 27 sekondash, Erjon Llapushi çohet dhe i vendos dorën në qafë kryekamarierit dhe pas sekonda më vonë merr nga tavolina thikën. Ai refuzon të lëvizë prej tavolinës.
Kryekamarieri Gazment Kurmaku largohet por debati ka vijuar me ofendime në distancë. Pikërisht në këtë moment, Erjon Llapushi nga Pogradeci çohet nga tavolina dhe e qëllon atë me grusht në kokë. 50 vjeçari ra duke përplasur kokën me një pjesë betoni duke përfunduar në gjendje kome.
Kujtojm se Erjon Llapushi ende nuk është kapur, ndërsa në kërkim është shpallur edhe shoku i tij, me akuzën e përkrahjes së autorit të krimit. Llapushi është emër shumë i njohur për drejtësinë shqiptare, i dënuar rregullisht që nga viti 2007, ndërsa për mikun e tij nuk ka ende asnjë informacion.
