Në kulmin e presionit amerikan ndaj Beogradit për të vendosur sanksione ndaj Rusisë, në Beograd do të mbërrijë ministri i Jashtëm rus Sergei Lavrov. Mediat serbe raportojnë se më 7 qershor ai do të vizitojë Beogradin, ku do të zhvillojë një takim me Presidentin serb Aleksandër Vuçiç.
Në takim pritet të diskutohet për luftën në Ukrainë dhe qëndrimin e Serbisë përballë situatës, si dhe për raportet Serbi-Kosovë.
Kjo është vizita e parë e një zyrtari të lartë rus në Serbi që nga fillimi i luftës dhe vjen në një kohë që BE po përgatit paketën më të ashpër të sanksioneve. Serbia është i vetmi vend në Evropë që nuk i është bashkuar sanksioneve anti-ruse dhe BE-ja ka rritur presionin ndaj Beogradit. Po ashtu, sipas mediave serbe, ai pritet të flasë edhe sa i takon Kosovës, por dhe deklaratave të Putinit që e krahasoi me Donbasin.
Mirëpo, vizita e tij shihet si një lëvizje strategjike e Putinit, për të ndalur “rrëshqitjen” e Serbisë. Beogradi nuk ka vendosur sanksione, mirëpo në OKB ka mbajtur qëndrime kundër Rusisë. Po ashtu presionet nga SHBA dhe nga BE ndaj Serbisë janë rritur ndjeshëm, pasi Vuçiçit i është bërë e qartë se nuk mund të luajë me dy porta. Putini po dërgon njeriun e tij më të besuar për të ndalur çdo tradhti të Vuçiçit.
Pak ditë më parë ishte përfaqësuesi i lartë për politikën e jashtme dhe të sigurisë së Bashkimit Europian, Josep Borrell, ai që lëshoi një mesazh të fortë. “Për mua ashtu si dhe shumë ministra të Jashtëm është e qartë, se të mbash lidhje të ngushta me regjimin e Putinit nuk përputhet më me ndërtimin e një të ardhme të përbashkët europiane. Të dyja gjërat njëkohësisht nuk përputhen me njëra tjetrën. Të qenit neutral sot në raport me luftën në Ukrainë është koncept fals. Një vend ka pushtuar tjetrin. Duke i vendosur të dyja vendet në të njëjtën nivel, kjo zbeh diferencën mes sulmuesit dhe të sulmuarit. Kjo nuk është e mundur”, tha ai.
Vizita e Lvarov shihet si një lëvizje e Putinit për të trazuar Ballkanin, në një kohë kur SHBA dhe BE e kanë bërë të qartë se Rusia mund të tentojë ta përçojë krizën në rajon. Mediat serbe raportojnë se ai pritet të flasë ashpër për Kosovën si dhe për situatën në Bosnje.
Nuk duhet harrur që në një konferencë shtypi me gazetarët serbë në Rusi, Lavrov sulmoi dhe shqiptarët duke thënë që kanë dërguar mercenarë në Ukrainë. Te tilla deklarata pritet të përsëriten, çka dëshmon se Putini po tenton ta shtrijë ndikimin dhe në Ballkan.
