“Rusia është gati të rifillojë dialogun me Ukrainën”. Kjo është deklarata e presidentit rus Vladimir Putin gjatë një bisede telefonike me presidentin francez, Emmanuel Macron dhe me kancelarin gjerman, Olaf Scholz.
Sipas raporteve nga Kremlini, Putin diskutoi situatën në Ukrainë me homologët e tij francezë dhe gjermanë, duke deklaruar se Rusia është e gatshme të të rifillojë bisedimet e paqes me Kievin. Po ashtu ai u shpreh se Moska është gati të bëjë lehtësira sa i takon eksportit të grurit që është bllokuar në Detin e Zi.
“Presidenti rus dha informacion të detajuar mbi zhvillimet e fundit të operacionit ushtarak special, duke vënë në dukje se forcat e armatosura ruse respektojnë me përpikëri rregullat e së drejtës ndërkombëtare humanitare”, thuhet në deklaratën e Kremlinit.
Por edhe pse u duk si i tërhequr, Putini ka lëshuar dhe paralajmërime për Perëndimin. Ai ka sulmuar vendet që po mbështesin Ukrainën. “Furnizimi me armë i Ukrainës nga Perëndimi rrezikon të krijojë destabilizimin e mëtejshëm”, ka thënë ai. Më tej Putini është shprehur se duhet të hiqen sanksionet në mënyrë që të stabilizohet kriza ushqimore.
Nga ana tjetër, Macron dhe Scholz i kanë kërkuar presidentit rus që të nisë “negociatat e drejtpërdrejta dhe serioze” me Volodymyr Zelenskyn.
