Natyrisht që Beogradi është në delir. Siç dhe mediat e tij e kanë potencuar, në pranga janë ata që makina serbe e propogandës i quan “monstrume”. Por është vetëm fillimi.
Një proces gjyqësor, është shpesh më i mirë se një proces politik.
Natyrisht nuk është si gjyqi ndaj përbindshave që kryen krime në Bosnjë, Kroaci dhe Kosovë, ku kishte aq dëshmi e video dëshmi që e gjithë bota mbarë e dinte.
Gjykata Speciale ka një “kleçkë” të rrezikshme për të sqaruar, atë që Prokurori e ka quajtur kupolën e UÇK-së si një “Ndërmarrje Kriminale”-pra një “Bandë”, njësoj si një “organizatë kriminale” tek mafiet.
Dhe kjo dihet se ka qenë shtysa e Serbisë, pasi kërkon që të deligjitimojë faktorin që solli lirinë e Kosovës dhe bashkë me të, të nisë më pas procesin për ta defaktorizuar një proces që si katalizator pati Ushtrinë Çlirimtare.
Ndërkaq, UÇK-ja nuk mund të konsiderohet asesi një bandë apo organizatë kriminale, në çdo logjikë juridike, ngase realisht ajo gjykohet sipas Kodit Penal të Republikës së Kosovës, i cili nuk ka nene për “separatizëm” e për “irridentizëm” që të dënojë kupolën e UÇK-së.
Bashkëpunimi që ka lidhur drejtuesit e UÇK-së ka qenë lufta ndaj një shteti apo makine shtetërore që nuk përmendet në Kodin Penal të Kosovës.
Pra, asnjë gjykatë nuk mund ta sjellë e të gjejë “bashkëpunimin” si logjikë kriminale, pasi qëllimi i UÇK-së ka qenë vetëm ushtarak e politik.
E këtu, në këtë pikë, duhet që krerët e UÇK-së ta nderojnë veten dhe vendin e tyre, duke e lartësuar misionin e Ushtrisë Çlirimtare, pa menduar për fatin e tyre, për frustrimet e tyre, për hallet e tyre, për sedrën e tyre, për mërzitjet e tyre, e natyrisht edhe për emocionet e tyre.
Sot e gjithë bota e shikon këtë proces ku në pyetje është fati i Kosovës; e këta njerëz që dikur kanë qenë në krye të luftës e më pas në krye të shtetit, duhet ta kuptojnë se kanë një përgjegjësi shumë më të madhe.
Nëse dëshmitarët për ngjarje të veçanta mund të dalin gjatë procesit, të gjithë të akuzuarit do të duhet t’i sqarojnë me hollësi, të tregojnë gjithçka, pasi në fund do të duhet të mbrojnë nderin e një organizate që në të gjithë shqiptarinë është një krenari. E si e tillë, nuk duhet që ngjarje të veçanta qoftë edhe të rënda të krijojnë mundësinë që të fusin në kurth drejtuesit e UÇK-së.
Ky gjyq nuk është proces për të shkuarën e Kosovës, edhe pse është një rast i mirë për ta sqaruar me detaje, por një mundësi për të ardhmen e saj.
Ka një precedent që shërben si model; Avni Rustemi kreu vrasje të shkallës së parë në Paris dhe doli i pafajshëm nga gjyqi, pasi u kthye nga i akuzuar në akuzues.
Këtë duhet ta bëjnë edhe Hashim Thaçi me shokë; të mos mendojnë për veten, të mos mendojnë mllefin ndaj kundërshtarëve politikë, por të ndjejnë sesi të gjithë shqiptarët i kanë sytë në Hagë; që procesi ndaj tyre të mos kthehet një gjyq ndaj Kosovës…/Pamfleti
