Ka afro 3 vite, që pothuajse takimet, pritjet dhe eventet zyrtare, po bëhen në këtë hotel, me shpenzime pa tender, ngaqë është qokë e kryeministrit Rama ndaj pronarëve të këtij hoteli me kazino konfidenciale të kupolës qeveritare, oligarkike e krerëve të mafies; prandaj faturat paguhen me tarifa shërbimesh e produktesh, me çmime 3-5 herë më të larta se çmimet që kanë hotele të njëjta e madje më luksoz në Francë, Austri, Gjermani, Itali, Kroaci etj.
Megjithëse çdo 3 muaj, qeveria vazhdon, shton varfërinë e merr miliona Euro borxhe nga bankat dhe qeveritë e huaja, nuk po i ndahet kapardisjes e luksit, të paguar me taksat e shqiptarëve.
Përveç mobilimit të zyrave, makinave të shtrenjta e udhëtimeve të qejfit jashtë Shqipërisë, kryeministri dhe ministrat po harxhojnë miliona lekë fonde shteti, si pagesa në hotelet e resortet luksoze për mbledhje, konferenca, bankete e ahengje.
Sipas një informacioni që ka ardhur në “Pamfleti”, rezulton se Kryeministria, ministritë, Bashkia Tiranë, drejtoritë qendrore, entet shtetërore, institucione të pavarura e qendrore të drejtësisë, agjenci e inspektorate, po paguajnë miliona lek pa tender te hotel “Plaza” për aktivitete zyrtare.
Vetëm gjatë 20 ditëve të para të janarit 2022, në xhepat e ortakëve të këtij hoteli, kanë shkuar 382 milion lekë nga buxheti i shtetit, me objekt pagesa për qira, salla konferencash, promovime, pritje zyrtare, dreka, darka, fjetje, takime të mbyllura, mbrëmje muzikore për të ftuar të huaj etj.
Po sipas këtij informacioni, kryeministria, ministritë dhe 32 institucione të tjera të vartësisë, kanë planifikuar, që gjatë muajit shkurt, të organizojnë 94 mbledhje, seminare, konferenca, darka, dreka pune e fjetje për të ftuar të huaj, por dhe aktivitete argëtimi.
Nga këto, 4 aktivitete i ka planifikuar Kryeministria, 6 Bashkia e Tiranës në kuadër të programit “Tirana Kryeqyteti Evropian i Rinisë 2022”; ndërsa 4 aktivitete i kanë planifikuar Ministria e Energjisë, Ministria e Ekonomisë, Ministria e Sipërmarrjes dhe Ministria e Turizmit, në kuadër të nismës “Ballkani i Hapur” me investitorë serbë e maqedonas.
Vetëm Ministrja e Rinisë dhe Fëmijëve, Bora Muzhaqi, ka planifikuar te hotel “Plaza”, 3 mbasdite e mbrëmje bashkëbisedimi, njohje e argëtimi, në kuadër të Shën Valentinit, duke bashkëvepruar me Agjencinë Shtetërore të Rinisë, strukturë në vartësi të kryeministrit Rama.
Nuk dihet se sa million lekë, do harxhohen për këto 94 aktivitete të planifikuara deri tani në muajin shkurt, në këtë hotel luksoz qendër relaksi për ministrat, oligarkët, kontrabandistët e trafikantët, ku 1 kafe kushton sa 1 ditë pune ndërtuesi e 1 ujë kushton sa 5 bidona me qumësht./Pamfleti
