Nga 1 korriku nis zbatimi i gjobave për shitësit që vijojnë përdorimin e qeseve plastike njëpërdorimshe në Shqipëri.
Përmes një mesazhi në rrjetet sociale, Rama bën me dije se zëvendësimi i qeseve të dëmshme të plastikës me trasta apo qese letre, ndihmon në mbrojtjen e mjedisit dhe të shëndetit.
“Kënaqësia e qeseve prej letre në pazaret e ditës. Sa mirë të shohësh që përditë e më shumë tregtarë po zëvendësojnë qeset e dëmshme plastike, me qeset e shëndetshme të letrës, ndërsa shumë blerës po marrin trasta për pazar. Kështu mbrojmë Shqipërinë e fëmijëve tanë nga dëmi i frikshëm i qeseve plastike mbi mjedisin dhe shëndetin. Në 1 korrik nis aktivizimi i gjobave!”– shkruan Rama.
Lajmin është konfirmuar edhe nga ministrja e Turizmit dhe Mjedisit, Mirela Kumbaro, e cila u bën thirrje qytetarëve të përdorin qese letre për pazaret e tyre.
“Kënaqësia e qeseve prej letre në pazaret e ditës! Dhe mos harro, nga 1 korriku fillon zbatimi i gjobave që ligji parashikon për shitësit që vijojnë përdorimin e qeseve plastike njëpërdorimshe! Prandaj thuaj jo qeseve plastike. Pastrojmë Shqipërinë”, shkruan Kumbaro.
Vlen të theksohet se, vendimi për të ndaluar shitjen në çdo njësi tregtare të qeseve njëpërdorimshme, me trashësi deri në 70 mikronë, hyri në fuqi 1 qershor të këtij viti.
