Kryeministri Edi Rama ka zhvilluar edhe sot aktivitetin të llojit të tij ‘one man show’, në prag të zgjedhjeve të 25 prillit. Gjatë fjalës së tij, Rama tha se në këto zgjedhje nuk janë parti në garë, por “një forcë qeverisëse sot dhe nesër”
Teksa shigjetoi Presidentin, kryeministri Rama u shpreh 25 prilli është një udhëkryq, ku shqiptarët do të zgjedhin midis reformës në drejtësi dhe Ilir Metës e koalicionit PD-LSI.
Gjatë fjalës së tij në prezantimin e programit “Shëndetësia që Duam”, në Facebook, u shpreh se:
“Ne nuk jemi një nga partitë në garë, ne jemi forca qeverisëse sot dhe nesër. Për ne kjo fushatë nuk është një hapësirë për të ngritur në radhë premtimet tona, por është një mundësi për t’ju njohur me planin tonë konkret.
25 prilli është një udhëkryq për drejtësi dhe në 25 prill si kundër, na ka ndihmuar Presidenti aktual që flet dhe në emër të atij më famëkeq president të kësaj republike, ju do të vendosni me drejtësinë apo me Ilir Metën. Me reformën në drejtësi apo me koalicionin KCK-PD-LSI” tha Rama.
Ai u shpreh se qytetarët duhet të vazhdojnë përpara e të mos kthehen pas, duke ju referuar opozitës, si e vetmja mënyrë për të dalë nga pandemia.
Rama u shpreh se qeveria e tij asnjëherë nuk e ka ndalur punën pavarësisht fatkeqësive.
