Sikur të mos mjaftonin sulmet ndaj Edi Ramës dhe ambasadores amerikane Yuri Kim, apo Lulzim Bashës, Sali Berisha nuk ka nguruar të bëjë pjesë të “luftës politike” edhe persona në radhët e PD-së, për arsye se nuk iu bashkuan “Foltores”.
I ndalur në Patos, Sali Berisha ka vendosur në shënjestër të sulmeve Agron Kapllanaj, pasi ky i fundit që në sherrin brenda PD vendosi të mbajë anë e Lulzim Bashës. Teksa e sulmon atë për milionat që ka marrë gjatë qeverisjes së PS për ndërtimet, Berisha- tashmë që i leverdis vendos t’i nxjerr ‘lakrat’ Kapllanajt– ndërsa kërkon përjashtimin e kreut të PD-së Fier nga kjo forcë politike.
Ndërsa i referohet si “pallat Kapllanaj”, Berisha hedh hipoteza se ky i fundit që rri në krahun e Bashës se mos ka përfituar ndonjë pallat në projektin e kullave në selinë e PD-së.
“Ti je me Lul bravën e parkut të 4 hajdutëve që ka shitur selinë për të ndërtuar pallate bashkë me Ramën dhe Veliajn dhe për këtë arsye mbyll dyert dhe nuk lejon demokratët në shtëpinë e tyre. Me cilin je ti me “Pallat Kapllanin” që fiton gjatë qeverisjes socialiste dhjetëra milionë euro dhe vjen e prishë shtëpitë e fukarenjve për të ndërtuar pallatin e milionave së bashku me Lulzim Bashën. Këto janë gjakpirës, çdo pasuri dhe euro e kanë vendosur mbi gjakun tuaj, janë hajdutër. “Pallat Kapllanaj” si i fitove ti 32 mln euro gjatë qeverisjes socialistë, sa pagove? Dhe tani na hiqesh si demokrat, je një turp që duhet të largohesh menjëherë nga PD, bëhesh vegël e Lul bravës, sigurisht ti ka rrezik që “Pallat Kapllanaj” të ketë marrë edhe ndonjë pallat te parku i 4 hajdutëve”, tha Berisha nga Patosi.
