“Haklajt” janë tashmë një histori mjaft e njohur në Shqipëri, regjistruar si saga tragjike e vrasjes së djemve të kësaj familje gjatë viteve të trranzicionit.
Për vrasjet, djegien e Kullës, por edhe prishjen e varreve të djemve të Haklajve, familjarët që ndodhen në mërgim prej vitesh kanë akuzuar Sali Berishën.
Mirëpo ditët e fundit, Haklajt janë rikthyer fuqishëm në publik, duke hapur një faqe në rrjetet sociale, faqe që po merr përditë e më shumë një “përmbytje” ndjekësish.
Në faqe janë publikuar kryesisht foto të njerëzve të shumtë që vizitojnë varret e Kullën e Haklajve në Kërrnajë të Tropojës, vizitorë nga e gjithë Shqipëria e trevat shqiptare në Kosovë, Maqedoninë e Veriut, Luginën e Preshevës e Mal të Zi, që familjarisht kryejnë “peligrinazh” në këtë vend.
Në fillim, ky “rikthim” në publik i Haklajve u kujtua si një kujdes për të përkujtuar të dashurit e tyre, që u vranë e u persekutuan nga qeverisjet e Sali Berishës. Por, duket se bëhet fjalë për më shumë, për një rikthim, për të qenë një zë i rëndësishëm publik, e sipas gjasave bëhet fjalë edhe për një padi penale përkundër Sali Berishës. Gjë që e kanë bërë të ditur edhe dy motrat e Haklajve: Aishe dhe Zylfie, të cilat në një dokumentar të transmetuar në “Top Channel”, deklaruan se do të padisnin Berishën në organet e drejtësisë së re. Dokumentar i cili ka arritur në miliona shikime, prej interesit që ka kjo ngjarje.
Në faqen e facebook : “Haklajt e Tropojës”, shkruhet: “Të dashur bashkëatdhetarë, ju ftoj ata që kanë mundësi që me datën 23.01.2022 (të Dielën) ora 11:00 në kullën shekullore të Haklajve në Fshatin Kërrnaj, për një vizitë të përbashkët nga të gjitha trojet Shqiptare”.
Sali Berisha është ruajtur gjithmonë nga frika e hakmarrjes prej Haklajve. Madje gjatë kohës kur Berisha ishte kryeministër u fol se një nip i Haklajve, që kishte qenë ushtarak në ushtrinë gjermane, snajperist i zoti kishte në plan të vriste Berishën. i cili edhe sot e kësaj dite ruhet nga një eskortë mjaft e madhe.
Por motrat e Haklajve në dokumentarin e 2 viteve më parë deklaruan se ata nuk donin të hakmerreshin e as të prishnin jetën e nipërve të tyre që tashmë jetojnë një jetë tjetër në Suedi e vende të tjera të Europës. Ata kërkojnë vetëm drejtësi!/Pamfleti
