Sali Berisha do të rivalizojë sot Ibsen Elezin për drejtimin e Partisë Demokratike, në zgjedhjet që do të zhvillohen nga Komisioni i Rithemelimit.
Procesi i votimit do të nisë në orën 08:00 e do të mbyllet në orën 18:00 dhe do të zhvillohet në 108 qendra qendra votimi.
Në fund të këtyre zgjedhjeve farsë që nuk njihen nga asnjë palë politike (veç ithtarëve të ish kryeministrit), Berisha me shumë mundësi do të jetë fituesi përballë Ibsen Elezit, në një garë që nuk e favorizon këtë të fundit për të marrë drejtimin e Partisë Demokratike, që vetëm dy ditë më parë kërkoi shtyrjen e procesit zgjedhor.
Edhe në fletën e votimit, emri i Sali Berishës renditet i pari, ndërsa i dyti Ibsen Elezi.
Sipas Rithemelimit anëtarët e Këshillit Kombëtar të PD do të votojnë në njërën prej dy qendrave të votimit në Selinë Qendrore të Partisë Demokratike, ose në degët ku ata janë të deleguar pasi të kenë njoftuar pranë Komisionit.
Ndërkohë Komisioni i Organizimit dhe Kontrollit të Operacioneve Elektorale fton të gjithë anëtarët e PD të bëhen pjesë e procesit të votimit për zgjedhjen e Kryetarit të PDSH me parimin “një anëtar një votë”.
Këto zgjedhje të cilat mbahen nga Komisioni i Rithemelimit, vijnë në një kohë që çështja e drejtimit të PD është ende pa një vendim të fundit nga ana e Gjykatës, e cila pak javë më parë ka pranuar ankimin e Enkelejd Alibeaj, kundër vendimit të gjyqtarit Agron Zhukri, që regjistroi ndryshimet Statutore të PD të bëra në Kuvendin e 11 dhjetorit të zhvilluar nga Komisioni i Rithemelimit.
Pa pritur vendimin e Gjykatës, Komisioni i Rithemelimit caktoi me urgjencë datën e zgjedhjeve të reja në Kuvendin e 30 Prillit, ndonëse nga pala tjetër, që është konsideruar si e Alibeajt, këto zgjedhje janë të njëanshme dhe nuk kanë përfshirë të gjithë demokratët.
